വിവാഹസദസ്സിൽ കോൺഗ്രസ്​ അംഗത്വം സ്വീകരിച്ച്​ നവദമ്പതികൾ

ചെങ്ങന്നൂർ: നവദമ്പതികൾ വിവാഹിതരായ ശേഷം കോൺഗ്രസി‍ൻെറ പ്രാഥമികാംഗത്വം സ്വീകരിച്ചു. ഭരണിക്കാവ് ദേവിക്ഷേത്രത്തിൽ വ്യാഴാഴ്ച നടന്ന വിവാഹത്തിലാണ് അത്യപൂർവ രാഷ്ട്രീയപ്രവേശനം. മാന്നാർ കുരട്ടിക്കാട് പുളിവേലിൽ മഠം സദാശിവത്തിൽ പരേതനായ ഭൂഷൺ നായർ-ബിന്ദുനായർ ദമ്പതികളുടെ മകൻ രാഹുൽ നായരും ഭരണിക്കാവ് വടക്ക്, കുരണ്ടിപ്പള്ളിൽ വീട്ടിൽ, പ്രകാശ് ഡി. പിള്ള-സുനിത ദമ്പതികളുടെ മകൾ അഞ്ജലി എസ്. പിള്ളയുമാണ് അംഗത്വം സ്വീകരിച്ചത്​. വിവാഹ മണ്ഡപത്തിൽനിന്ന്​ ഇറങ്ങിയശേഷം വധൂവരന്മാർ ആദ്യം ചെയ്തത് കോൺഗ്രസ് പാർട്ടിയിൽ ഓൺലൈനായി എടുത്ത മെംബർഷിപ് ഏറ്റുവാങ്ങലായിരുന്നു. മാന്നാർ ബ്ലോക്ക് കോൺഗ്രസ് ജനറൽ സെക്രട്ടറി സുജിത് ശ്രീരംഗം, മഹിള കോൺഗ്രസ് മണ്ഡലം പ്രസിഡന്‍റ്​ വത്സല ബാലകൃഷ്ണൻ, ഗണേഷ് ജി. മാന്നാർ, പ്രദീപ് ശാന്തിസദനം എന്നിവർ പ​ങ്കെടുത്തു.