ലക്ഷങ്ങൾ മുടക്കി സ്ഥാപിച്ച സോളാർ വഴിവിളക്കുകൾ മിഴിയടച്ചു

തുറവൂർ: കുത്തിയതോട് പഞ്ചായത്ത്​ 2016-18 സാമ്പത്തികവർഷം ജനകീയാസൂത്രണ പദ്ധതിയിൽ ഉൾപ്പെടുത്തി ലക്ഷങ്ങൾ ചെലവിട്ട് സ്ഥാപിച്ച സോളാർ വഴിവിളക്കുകൾ അണഞ്ഞു. വൈദ്യുതിച്ചെലവ്​ കുറക്കുന്നതിനുപരി വൈദ്യുതി തടസ്സം ഉണ്ടായാലും വിളക്കുകൾ തെളിയണം എന്ന ലക്ഷ്യത്തോടെയാണ് സോളാർ വഴിവിളക്കുകൾ പഞ്ചായത്തിലുടനീളം സ്ഥാപിച്ചത്. രാ​ത്രി ഇരുട്ടിലായ വഴികളിലൂടെ സഞ്ചരിക്കാൻ ഭയപ്പെടുകയാണ് ജനം. സോളാർ പാനലുകളും വൈദ്യുതി ശേഖരിക്കുന്നതിനാവശ്യമായ വിലകൂടിയ ബാറ്ററികളും കേടായാൽ യഥാസമയം നന്നാക്കാൻ കഴിയാതിരുന്നതാണ് വിളക്കുകൾ എന്നന്നേക്കുമായി കണ്ണടക്കാൻ കാരണമായത്. കുത്തിയതോട് പഞ്ചായത്തിൽ കാടുകയറി അനാസ്ഥയുടെ നേർക്കാഴ്ചയായി നിലകൊള്ളുന്ന സോളാർ വഴിവിളക്കുകൾ അടിയന്തരമായി നന്നാക്കണമെന്നാണ്​ ജനകീയ ആവശ്യം. പടം : കുത്തിയതോട് പഞ്ചായത്തിലെ സോളാർ വഴിവിളക്കുകൾ കാടുകയറിയ നിലയിൽ