പെട്ടിയും പറയും 'പെട്ടിയിലാകും' വെര്‍ട്ടിക്കല്‍ ആക്സിൽ ഫ്ലോ പമ്പുകൾ വിജയകരം

കുട്ടനാട്: പെട്ടിയും പറക്കും പകരം കുട്ടനാട്ടിലെങ്ങും ഇനി മോട്ടോർ പമ്പുകൾ സ്ഥാനം പിടിക്കും. ' വെർട്ടിക്കൽ ആക്സിൽ ഫ്ലോ പമ്പ്' എന്ന മോട്ടോറുകളാണ് നെൽപാടങ്ങളിൽ പ്രവർത്തിപ്പിക്കുക. ഒരേ മാതൃകയിലുള്ള മോട്ടോർ പമ്പുകൾക്ക് പ്രവർത്തന ക്ഷമത ഏറെയാണെന്നതാണ് പ്രത്യേകത. പാടശേഖര സമിതികൾക്ക്​ ജില്ല പഞ്ചായത്ത് സൗജന്യമായി ഇവ ലഭ്യമാക്കും. കുട്ടനാട്ടിലെ റാണി -ചിത്തിരക്കായൽ പാടശേഖരങ്ങളിൽ ഒരു വര്‍ഷമായി ഈ മോട്ടാർപമ്പ് ഉപയോഗിക്കുന്നുണ്ട്. വിജയമെന്ന്​ കണ്ടതോടെ കുട്ടനാട്ടിലും അപ്പർ കുട്ടനാട് മേഖലകളിലേക്കും പമ്പിന്റെ ഉപയോഗം വ്യാപിപ്പിക്കാൻ കർഷകർ തീരുമാനിച്ചിട്ടുണ്ട്. രാഷ്ട്രീയ കൃഷിവികാസ് യോജനയിൽപെടുത്തി (ആർ.കെ.വി.വൈ) മോട്ടോർ ഷെഡ് നിർമിക്കുന്നത് കൃഷിവകുപ്പിന്റെ എൻജിനീയറിങ് വിഭാഗമാണ്. വൈദ്യുതി കണക്​ഷന് സർവിസ് കേബിളുകൾ വാങ്ങാൻ തുക പാടശേഖരങ്ങളുടെ ഫണ്ടിൽനിന്നാണ് ഉള്‍പ്പെടുത്തിയിരിക്കുന്നത്. മോ​ട്ടോർപമ്പ് സ്ഥാപിക്കുന്നതോടെ വളരെ വേഗത്തില്‍ പാടശേഖരത്തിലെ പമ്പിങ്​ പൂര്‍ത്തിയാക്കാന്‍ കഴിയും. പുഞ്ചകൃഷിക്കു മുമ്പ്​ പാടശേഖരങ്ങളിൽ സ്ഥാപിക്കുകയാണ് ലക്ഷ്യം. 27 ഞാറ്റുവേലകളിൽ 10 എണ്ണം നല്ല മഴ ലഭിക്കുന്നവയാണ്. ഇക്കാലയളവിൽ നെൽകൃഷിയെ രക്ഷിക്കുന്നതിൽ പെട്ടിക്കും പറക്കുമുള്ള സ്ഥാനം വലുതാണ്. വെള്ളം ഒഴുക്കിവിടുന്ന പെട്ടിയും വെള്ളം വലിച്ചെടുക്കുന്ന പറയുടെ രൂപത്തിലുള്ള ഉപകരണവും അടങ്ങുന്നതാണ്​ പെട്ടിയും പറയും. മോട്ടോറിന്റെ സഹായത്തോടെയാണ്​ പ്രവർത്തനം. പാടശേഖരങ്ങളിൽനിന്ന്​ വെള്ളം വറ്റിക്കുന്നതിനും ജലദൗർലഭ്യമുള്ളപ്പോൾ പുറംതോട്ടിൽനിന്ന്​ പാടശേഖരത്തിലേക്ക്​ പമ്പ് ചെയ്യുന്നതിനുമാണ് ഉപയോഗിക്കുന്നത്. പ്ലാവ്, മഹാഗണി, തേക്ക് തുടങ്ങിയ തടികളാണ് നിർമാണത്തിന്​ ഉപയോഗിക്കുന്നത്. പെട്ടിയും പറയും കുറ്റമറ്റ രീതിയിൽ നിർമിക്കുന്നവരുടെ എണ്ണം കുറഞ്ഞതും നിർമാണ -കൈകാര്യച്ചെലവ് കൂടുതലായതും കർഷകർക്ക്​ തിരിച്ചടിയായിരുന്നു. പകരമെത്തുന്ന പമ്പ് വെള്ളത്തിൽ മുക്കിയിടാമെന്നതും പ്രത്യേകതയാണ്. കർഷകർക്ക് അനായാസം കൈകാര്യം ചെയ്യാനും കഴിയും. എന്നാൽ, വോൾട്ടേജ് വ്യതിയാനമുള്ള സ്ഥലങ്ങളിൽ ഈ മോട്ടോർ ഉപയോഗിക്കാൻ കഴിയില്ലെന്നതാണ് തിരിച്ചടി. അനുശോചിച്ചു ആലപ്പുഴ: മുന്‍ മെത്രാന്‍ സ്റ്റീഫന്‍ അത്തിപ്പൊഴിയിലിന്‍റെ വേർപാടിൽ പി.പി. ചിത്തരഞ്ജൻ എം.എൽ.എ അനുശോചിച്ചു. ആലപ്പുഴ രൂപത മെത്രാനായി 21 വര്‍ഷം പ്രവർത്തിച്ച പിതാവിന്‍റെ വേര്‍പാട് ഏറെ ദുഃഖകരമാണ്. 2005ല്‍ ആലപ്പുഴ മുനിസിപ്പല്‍ ചെയര്‍മാനായി ചുമതല നിര്‍വഹിക്കുന്ന സന്ദര്‍ഭത്തില്‍ പിതാവ് നല്‍കിയ ഉപദേശ നിർദേശങ്ങള്‍ ഈ സന്ദര്‍ഭത്തില്‍ സ്മരിക്കുന്നതായും എം.എൽ.എ അനുശോചന സന്ദേശത്തിൽ പറഞ്ഞു.