താരമായി ഈത്തപ്പഴം; 'അജ്​വ'ക്ക്​ വിലകുറഞ്ഞു

ആലപ്പുഴ: റമദാൻ വിപണിയിലെ താരമായ ഈത്തപ്പഴത്തിന്​ ഇത്തവണയും ആവശ്യക്കാർ ഏറെ. സൗദിയിലെ മദീന, ജോര്‍ദാന്‍, ടുണീഷ്യ, ഫലസ്​തീൻ, ഇറാന്‍, അഫ്​ഗാൻ അടക്കമുള്ള വിവിധ രാജ്യങ്ങളിൽനിന്നാണ്​ ഈത്തപ്പഴം പ്രധാനമായും എത്തുന്നത്​. ഈത്തപ്പഴങ്ങളുടെ രാജാവായി അറിയപ്പെടുന്ന മദീനയിലെ 'അജ്‌വ'ക്കാണ്​ പ്രിയം. കിലോക്ക്​ 2400 രൂപ വരെയുണ്ടായിരുന്ന അജ്​വക്ക്​ ഇക്കുറി 900 രൂപയായി കുറഞ്ഞെന്ന്​​ ആലപ്പുഴ ഹലായീസ്​ റസ്​റ്റാറൻറ്​ ഉടമ മുഹമ്മദ്​ ഹനീഫ്​ സേട്ട്​ 'മാധ്യമ'ത്തോട്​ പറഞ്ഞു. കോവിഡ്​ മഹാമാരിയിൽ മക്കയിലെ മസ്​ജിദുൽ ഹറമിൽ വിശ്വാസികളുടെ തിരക്ക്​ കുറഞ്ഞതാണ്​ അജ്​വക്ക്​ വിലയിടിയാൻ കാരണം. തേനൂറും രുചിയും വലിപ്പവുമായി കിലോക്ക്​ 1500 രൂപ വിലവരുന്ന മജ്​ദൂൾ ആണ്​ മുന്നിൽ. ഫലസ്ത്രീൻ, ഇസ്രായേൽ എന്നിവിടങ്ങളിൽനിന്നാണ്​ ഇവയുടെ വരവ്​. മദീനയിൽനിന്നെത്തുന്ന ഈന്തപ്പഴങ്ങൾക്കാണ്​ ഇക്കുറി ആവശ്യക്കാർ ഏറെയുള്ളത്​. വലിപ്പംകുറഞ്ഞ ഖൽമീ (കിലോക്ക്)​-380 രൂപ, വലിപ്പമുള്ള മറിയം-380 രൂപ, അൽഒഫാദ്​-400 രൂപ, ഹുറുമ-340 രൂപ, സുൽത്താൻ-350 രൂപ, ടാറ്റ്​കോ-300 രൂപ, ജോഡ്​-300 രൂപ, ഫറാദി-260 രൂപ, ജംബോ ഡെയ്​സ്​-200 രൂപ, അരിനൂർ-220 രൂപ, യു.വി​.​എ ഡെയ്​സ്​-280 രൂപ, കിങ്​-300 രൂപ, ക്രാഫ്​റ്റ്​-300 രൂപ, മഷ്​റൂഖ്​-400 എന്നിങ്ങനെയാണ്​ വില. ഇവയിൽ ഞെ​ട്ടോടുകൂടിയ ടുണീഷ്യൻ പഴങ്ങളാണ്​ ഏറെ ആകർഷകം. പ്രത്യേകം പായ്​ക്കറ്റിൽ തനിമചോരാതെ എത്തുന്ന പഴങ്ങൾക്ക്​ 200 ഗ്രാമിന്​ 90 രൂപയാണ്​ വില. പ്രത്യേക ബോക്സിൽ എത്തുന്ന കീമിയക്ക്​ 170-190 രൂപയാണ്​ നിരക്ക്​. ഉണക്ക കാരയ്​ക്കക്കും ആവശ്യക്കാർ ഏറെയാണ്​. കിലോക്ക്​ 350 രൂപയാണ്​ വില. അത്തിയും ഒലിവും തേടിയും നിരവധിപേരാണ്​ എത്തുന്നത്​. അഫ്​ഗാനിൽനിന്ന്​ പ്രത്യേകപായ്ക്കറ്റിൽ എത്തുന്ന ഒലിവ്​ കായക്ക്​ (450 ഗ്രാം) 140 രൂപയും രുചികരമായ അമേരിക്കൻ ഗാർഡന്‍റെ ബ്ലാക്ക്​ ഒലിവിന്​ (450 ഗ്രാം) 225 രൂപയും നൽകണം. വിവിധ കമ്പനികളുടെ ഒലിവ്​ ​ഓയിലും സുലഭമാണ്​. അമേരിക്കയിലെ കാലിഫോർണിയയിൽനിന്നാണ്​ ബദാം, പിസ്​ത എന്നിവയുടെ വരവ്​. കഴിഞ്ഞരണ്ടുവർഷവും കോവിഡ്​ മൂലം പള്ളികളിൽ ആൾക്കൂട്ട നിയന്ത്രണമുണ്ടായിരുന്നതിനാൽ വിപണി വേണ്ടത്ര സജീവമല്ലായിരുന്നു. ഇക്കുറി കച്ചവടത്തിൽ ഉണർവുണ്ടാകുമെന്നാണ്​ പ്രതീക്ഷയിലാണ്​ വ്യാപാരികൾ. രുചിഭേദങ്ങളുമായി ഡ്രൈഫ്രൂട്​സും വ്യത്യസ്​ത രുചിഭേദങ്ങളുമായി ഡ്രൈഫ്രൂട്സ്​. ആരോഗ്യഗുണം ഏറെയുള്ള വാൾ​നട്ടിന് കിലോക്ക്​​ 1600രൂപയാണ്​. തൊട്ടുപിന്നിൽ 1300രൂപ വിലവരുന്ന അഫ്​ഗാന്‍റെ അൻജീരും ഇടംപിടിച്ചിട്ടുണ്ട്​. ആപ്രിക്കോട്ട്, പ്ലം, ബ്ലൂബെറി, വാള്‍നെട്ട്, കിവി, മാങ്ങ, പപ്പായ, പൈനാപ്പിൾ, ഓറഞ്ച്, പീച്ച്, ലെമണ്‍, സ്‌ട്രോബറി, ബ്ലാക്ക്​ബെറി, ബ്ലൂബെറി അടക്കമുള്ളവയാണ്​ വിപണിയിലുള്ളത്​. അപ്രിക്കോട്ടിന്​ 250രൂപയാണ്​ വില. അഫ്​ഗാൻ, ടുനീഷ്യ, തുർക്കി, അൾജീരിയ അടക്കമുള്ള രാജ്യങ്ങളി​ൽനിന്ന്​ പ്രത്യേക പായ്​ക്കറ്റുകളായി എത്തുന്നവക്കാണ്​ പ്രിയം. കിവി, സ്‌ട്രോബറി എന്നിവക്കാണ് ആവശ്യക്കാർ ഏറെയുള്ളത്​. നാരുകള്‍ ധാരാളമടങ്ങിയ ഡ്രൈഫ്രൂട്ടുകള്‍ വിറ്റാമിന്‍, കാല്‍സ്യം, ഇരുമ്പ് എന്നിവ അടങ്ങിയതിനാൽ രോഗപ്രതിരോധത്തിനും കൂടുതലായും ഉപയോഗിക്കുന്നുണ്ട്​. APL MB 01 Halais റമദാൻ വിപണി ലക്ഷ്യമിട്ട്​ വിവിധ രാജ്യങ്ങളിൽനിന്ന്​ ആലപ്പുഴ ഹലായീസിൽ വിൽപനക്കെത്തിച്ച ഈത്തപ്പഴങ്ങളും ഡ്രൈഫ്രൂട്സുകളും