ബജറ്റ് തുടർ വഞ്ചന; ബഹിഷ്കരിച്ച്​ പ്രതിപക്ഷം

ആലപ്പുഴ: ആലപ്പുഴ നഗരസഭ ബജറ്റ് തുടർ വഞ്ചനയെന്ന് കോൺഗ്രസ് പാർലമെന്‍ററി പാർട്ടി ലീഡർ റീഗോ രാജു. 2021-22 സാമ്പത്തിക വർഷ ബജറ്റിൽ പ്രഖ്യാപിച്ചിരുന്ന പദ്ധതികൾ സാമ്പത്തിക പരാധീനത പറഞ്ഞ് നടപ്പാക്കാതിരുന്നവർ ഈ ബജറ്റിൽ വീണ്ടും പ്രഖ്യാപനങ്ങളുമായി വന്നിരിക്കുകയാണ്. സ്റ്റേഡിയം രണ്ടാം ഘട്ട നിർമാണം, വർക്ക് നിയർ ഹോം സെന്‍ററുകൾ, നഗരം മുഴുവൻ കാമറ സ്ഥാപിച്ച് സുരക്ഷ വലയത്തിലാക്കൽ, മരാമത്ത് പണികൾക്ക് ഓരോ വാർഡിനും 17 ലക്ഷം തുടങ്ങിയവ കഴിഞ്ഞ ബജറ്റിലെ നടപ്പാക്കാത്ത പ്രഖ്യാപനങ്ങളാണ്​. ഭവന നിർമാണ പദ്ധതിയായ പി.എം.എ.വൈ തകിടം മറിച്ചെന്നും പ്രതിപക്ഷം ആരോപിച്ചു. നഗരത്തെ പിന്നോട്ടടിക്കുന്ന ഭരണസമിതി രാജിവെക്കണമെന്ന്​ ആവശ്യപ്പെട്ട് പ്രതിപക്ഷാംഗങ്ങൾ പ്ലക്കാർഡുകൾ ഉയർത്തി നടുത്തള്ളത്തിൽ ഇറങ്ങി പ്രതിഷേധിച്ചു. തുടർന്ന് കൗൺസിൽ ബഹിഷ്കരിച്ച് നഗരസഭ പടിക്കൽ കുത്തിയിരുന്ന്​ പ്രതിഷേധിച്ചു.