പുത്തൻവെളി പാടത്ത്​ പച്ചക്കറിക്ക്​ നൂറുമേനി

ചേർത്തല: കഞ്ഞിക്കുഴി പുത്തൻവെളിയിലെ പാടത്ത്​ വിളഞ്ഞ പത്തര മാറ്റുള്ള പച്ചക്കറികൾ. പുത്തൻവെളി ഹരിദാസും കുടുംബവും 10 ഏക്കർ പാടശേഖരത്തിൽ നടത്തിയ ജൈവപച്ചക്കറികളുടെ വിളവെടുപ്പ് ഉദ്​ഘാടനം കൃഷിമന്ത്രി പി. പ്രസാദ് നിർവഹിച്ചു. പടവലവും വെണ്ടയും പാവലും പയറിനുപുറമെ കണിവെള്ളരിയും മത്തനും ഇളവനുമൊക്കെ പാടത്ത് പാകമായി. വിളവെടുപ്പ് ഉത്സവത്തിൽ ഗ്രാമപഞ്ചായത്ത് പ്രസിഡന്റ് ഗീത കാർത്തികേയൻ, വൈസ് പ്രസിഡന്റ് എം. സന്തോഷ് കുമാർ, ജില്ല പഞ്ചായത്ത്​ അംഗം വി. ഉത്തമൻ, എസ്. ഹെബിൻ ദാസ്, പഞ്ചായത്ത്​ അംഗം സി.കെ. ശോഭനൻ, രാജൻ മഠത്തിൽ, വി. സുദർശനൻ, പി.പി. രാജു, കൃഷി ഓഫിസർ ജാനിഷ് ജേക്കബ്, വി.ടി. സുരേഷ്, എസ്.ഡി. അനില, സുമേഷ്, ഹരിദാസ്, വിക്രമൻ എന്നിവർ പങ്കെടുത്തു.