ലക്ഷ്യം ചേർത്തലയുടെ സമഗ്ര മാറ്റമെന്ന്​ ചെയർപേഴ്​സൺ

ചേര്‍ത്തല: ടൗണിന്റെ മുഖച്ഛായ മാറ്റുന്നതിന്​ ജനങ്ങളില്‍നിന്ന്​ നിർദേശം സ്വീകരിച്ച് പദ്ധതികള്‍ക്ക്​ രൂപം നല്‍കിയുള്ള ചേര്‍ത്തല നഗരസഭയുടെ ബജറ്റിന് കൗണ്‍സില്‍ അംഗീകാരം. 80,78,81,530 രൂപ വരവും 78,52,49,500 ചെലവും 2,26,32,030 രൂപ നീക്കിയിരിപ്പുമുള്ള ബജറ്റാണ് വൈസ് ചെയര്‍മാന്‍ ടി.എസ്. അജയകുമാര്‍ അവതരിപ്പിച്ചത്. ശുചിത്വ നഗരത്തിനും എല്ലാ വാര്‍ഡിലും തൊഴില്‍ സംരംഭങ്ങള്‍ക്കും വിനോദസഞ്ചാര, ആരോഗ്യ മേഖലക്ക്​ പ്രാധാന്യം നല്‍കിയാണ് ബജറ്റ് ആവിഷ്കരിച്ചിരിക്കുന്നത്. നഗരത്തെ മാലിന്യമുക്തമാക്കാനും സമ്പൂര്‍ണ ശുചിത്വഗ്രാമമാക്കാനും ചേലൊത്ത ചേര്‍ത്തല പദ്ധതിക്ക്​ 30 ലക്ഷമാണ് വകയിരുത്തിയിരിക്കുന്നത്. ഒരുവാര്‍ഡില്‍നിന്ന്​ ഒരു ഉല്‍പന്നം വിപണിയിലിറക്കുക എന്ന ലക്ഷ്യത്തില്‍ വണ്‍ വാര്‍ഡ് വണ്‍ പ്രോഡക്ട് പദ്ധതി പ്രകാരം എല്ലാ വാര്‍ഡിലും തൊഴില്‍ സംരംഭക പദ്ധതികള്‍ക്ക്​ 70 ലക്ഷം വകയിരുത്തിയിട്ടുണ്ട്. ടി.ബി കനാലിനെയും എ.എസ് കനാലിനെയും കുറിയമുട്ടം കായലിനെയും ബന്ധപ്പെടുത്തി ബോട്ടിങ്ങടക്കം തുടങ്ങി നഗരത്തെ വിനോദസഞ്ചാര കേന്ദ്രമാക്കാനുള്ള പദ്ധതികളും വിഭാവനം ചെയ്തിട്ടുണ്ട്. നഗരത്തിന്റെ സമഗ്രമാറ്റത്തിനുതകുന്ന തരത്തില്‍ ജനങ്ങളുമായി സംവദിച്ചാണ് പദ്ധതികള്‍ തയാറാക്കിയതെന്ന് ചെയര്‍പേഴ്‌സൻ ഷേര്‍ളി ഭാര്‍ഗവന്‍ വാർത്തസമ്മേളനത്തില്‍ പറഞ്ഞു.