തിരുവിതാംകൂർ ലേബർ അസോസിയേഷൻ ശതാബ്​ദി: വാടപ്പുറം ബാവയെ മറന്നുപോകുന്നത്​ നന്ദികേട്​- വി.ഡി സതീശൻ

ആലപ്പുഴ: ജയിക്കുന്നവൻ പറയുന്നതാണ്​ പലപ്പോഴും ചരിത്രമായി രേഖപ്പെടുത്തിയതെന്നും ഇത്​ വസ്തുതാപരമായ ശരി ഇതായിക്കൊള്ളണമെന്നില്ലെന്നും പ്രതിപക്ഷ നേതാവ്​ വി.ഡി. സതീശൻ. കേരളത്തിലെ തൊഴിലാളി പ്രസ്ഥാനത്തിന് തുടക്കം കുറിച്ച വാടപ്പുറം ബാവയെ മറന്നു പോകുന്നത് നന്ദികേടാണെന്നും പ്രതിപക്ഷ നേതാവ് പറഞ്ഞു. വാടപ്പുറം ബാവ ഫൗണ്ടേഷൻ സംഘടിപ്പിച്ച 'ചരിത്രം സംസ്കരിച്ച തിരുവിതാംകൂർ ലേബർ അസോസിയേഷൻ നൂറാം ജന്മവാർഷിക സമ്മേളനം' ഉദ്​ഘാടനം ചെയ്യുകയായിരുന്നു അദ്ദേഹം. കേരളത്തിലെ തൊഴിലാളി പ്രസ്ഥാനത്തിന്റെ ചരിത്രം ആരംഭിക്കുന്നത് ബാവയിലൂടെ ആണെന്നത് യഥാർഥ ചരിത്രമാണ്​. തൊഴിലാളി പ്രസ്ഥാനത്തിന്റെ സ്ഥാപകനായ വാടപ്പുറം ബാവയുടെ ചിത്രം ഓഫിസിൽ വെക്കാൻ എല്ലാ തൊഴിലാളി സംഘടനകളും തയാറാകണം. തന്‍റെ മേഖലയിൽ ഐ.എൻ.ടി.യു.സി ഓഫിസുകളിൽ ഇത്​ ​ചെയ്യും. ചരിത്രം തിരസ്കരിക്കപ്പെട്ടവന്‍റേത്​ കൂടിയാണെന്ന്​ ഇൻസ്റ്റിറ്റ്യൂട്ട്​ ​​ഫോർ ലേബർ എജുക്കേഷൻ ആൻഡ്​​ റിസർച്​ ഉദ്​ഘാടനം ചെയ്ത എ.എം. ആരിഫ്​ എം.പി പറഞ്ഞു. കമ്യൂണിസ്റ്റ്​ പാർട്ടികളുടെ ജനനം എന്നെന്നത്​ പോലും തർക്കവിഷയമാണ്​. വാടപ്പുറം ബാവയെ കമ്യൂണിസ്റ്റുകാർ വിസ്മരിച്ചെന്ന വാദം​ തീർത്തും​ ശരിയല്ല. ആദ്യപാർട്ടി സെക്രട്ടറി മുഹമ്മദ്​ ഷെഫീക്കിന്‍റെ ചരമദിനമോ ജന്മദിനമോ ആചരിക്കാത്തത്​ ആരിഫ്​ ചൂണ്ടിക്കാട്ടി. ​​ശ്രീനാരായണ ഗുരു പോലും തമസ്കരിക്കപ്പെടുന്ന കാലത്ത്​ വാടപ്പുറം ബാവയെപ്പോലുള്ളവരെ മറന്നില്ലെങ്കിലേ അത്ഭുതമുള്ളൂയെന്ന് അനുഗ്രഹ പ്രഭാഷണം നടത്തിയ ശിവഗിരി ശ്രീനാരായണ ധർമസംഘം പ്രസിഡന്റ് സ്വാമി സച്ചിദാനന്ദ പറഞ്ഞു. വൈകുണ്ഡസ്വാമിയും തൈക്കാട്ട്​ അയ്യയും ചട്ടമ്പിസ്വാമികളും എന്നല്ല അയ്യങ്കാളി പോലും കഴിഞ്ഞിട്ടാണ്​ ശ്രീനാരായണ ഗുരുവിനെ പരാമർശിക്കുന്നതെന്നും രാജ്യം എങ്ങോട്ടാണ്​ പോകുന്നതെന്നും അദ്ദേഹം ചോദിച്ചു. വാടപ്പുറം ബാവ ഫൗണ്ടേഷൻ പ്രസിഡന്‍റ്​ സജീവ്​ ജനാർദനൻ അധ്യക്ഷത വഹിച്ചു. സജീവ്​ ജനാർദനൻ രചിച്ച 'വാടപ്പുറം ബാവ തമസ്കരിക്കപ്പെട്ട വിപ്ലവ നായകൻ' ​ഡോ. കെ.വി. പ്രമോദിന്​ നൽകി സ്വാമി പ്രകാശനം ചെയ്തു. ഫൗണ്ടേഷൻ സാഹിത്യ പുരസ്കാരം മലയാള ​മനോരമ ഡെ. എഡിറ്റർ രവിവർമ തമ്പുരാൻ ഏറ്റുവാങ്ങി. സ്വാമി അസ്പർശാനന്ദ, ഡോ. നെടുമുടി ഹരികുമാർ, ഷാബു ​പ്രസാദ്​, ഉദയഭാനു വാടപ്പുറം,വി. കമലാസനൻ, പി.ഡി. ശ്രീനിവാസൻ, ജാക്സൺ ആറാട്ടുകുളം എന്നിവർ സംസാരിച്ചു. -------- ചിത്രം: