ഡ്രൈവിങ്​ ടെസ്റ്റ്​ ഗ്രൗണ്ട്​ അളന്നുതിരിച്ചു

തൊടുപുഴ: കോലാനി അമരംകാവിന് സമീപം ഡ്രൈവിങ്​ ടെസ്റ്റ് നടന്നിരുന്ന ഗ്രൗണ്ടി‍ൻെറ ഉടമസ്ഥാവകാശം തഹസിൽദാരുടെയും താലൂക്ക് സർവേയറുടെയും നേതൃത്വത്തിൽ അളന്നുതിരിച്ച് മോട്ടോർവാഹന വകുപ്പിന് നൽകി. മൂവാറ്റുപുഴ വാലി ഇറിഗേഷൻ പദ്ധതി (എം.വി.ഐ.പി) അധികൃതർ മോട്ടോർവാഹന വകുപ്പിന് കൈമാറിയ 22.98 സെന്‍റ്​ സ്ഥലത്താണ്​ വർഷങ്ങളായി ടെസ്റ്റ് നടന്നത്. എന്നാ, കഴിഞ്ഞ മാസം പ്രദേശവാസികളായ ചിലർ ഇത് തങ്ങളുടെ കളിസ്ഥലമാണെന്ന് അവകാശപ്പെട്ട് ഗ്രൗണ്ട് കൈയേറി വല കെട്ടിയടച്ചതായി മോട്ടോർ വാഹന വകുപ്പ്​ ഉദ്യോഗസ്ഥർ പരാതി ഉന്നയിച്ചു. തുടർന്ന്, തൊടുപുഴ സി.ഐയുടെ സാന്നിധ്യത്തിൽ നടന്ന ചർച്ചയിലാണ്​ സ്ഥലം അളന്നുതിട്ടപ്പെടുത്താൻ തീരുമാനിച്ചത്​. കഴിഞ്ഞ ദിവസം തൊടുപുഴ തഹസിൽദാർ ജോസ്​കുട്ടി, ജോയന്‍റ്​ ആർ.ടി.ഒ എസ്.എസ്. പ്രദീപ്, എസ്.ഐ കൃഷ്ണൻനായർ, എം.വി.ഐ.പി അസി. എക്സിക്യൂട്ടിവ് എൻജിനീയർ രമ്യ എന്നിവരുടെ സാന്നിധ്യത്തിൽ താലൂക്ക് സർവേയർ അൻസ്​മോൻ അതി‌ർത്തി അളന്നുതിരിച്ച് കല്ലിട്ടത്. ഫാര്‍മസിസ്റ്റ് നിയമനം ഇടുക്കി: ജില്ലയിലെ ആയുര്‍വേദ സ്ഥാപനങ്ങളില്‍ ഒഴിവുള്ള ഫാര്‍മസിസ്റ്റ് തസ്തികയില്‍ ദിവസവേതന അടിസ്ഥാനത്തില്‍ 90 ദിവസത്തേക്ക്​ താല്‍ക്കാലിക നിയമനം നടത്തും. ഒരു വര്‍ഷത്തെ സര്‍ക്കാര്‍ അംഗീകൃത ആയുര്‍വേദ ഫാര്‍മസിസ്റ്റ് കോഴ്‌സ് യോഗ്യതയുള്ള ഉദ്യോഗാർഥികള്‍ മാര്‍ച്ച്​ 22ന് രാവിലെ 11.30ന് കുയിലിമല സിവില്‍ സ്റ്റേഷനില്‍ പ്രവര്‍ത്തിക്കുന്ന ജില്ല മെഡിക്കല്‍ ഓഫിസില്‍ (ആയുര്‍വേദം) അസ്സല്‍ സര്‍ട്ടിഫിക്കറ്റുകള്‍ സഹിതം കൂടിക്കാഴ്ചക്ക്​ ഹാജരാകണം. വിവരങ്ങള്‍ക്ക്: 04862 232318.