കെ.എസ്.ആർ.ടി.സി. ഓടിത്തുടങ്ങി

ആറാട്ടുപുഴ: വലിയഴീക്കൽ പാലത്തിന്‍റെ ഉദ്ഘാടനത്തിന്​ തൊട്ടുപിറകെ കെ.എസ്.ആർ.ടി.സി സർവിസുകൾ ഓടിത്തുടങ്ങി. ഹരിപ്പാട് ഡി​പ്പോയിലെ ബസാണ് നിറയെ യാത്രക്കാരുമായി വലിയഴീക്കൽനിന്ന്​ കരുനാഗപ്പള്ളിയിലേക്ക് പാലം കടന്ന് ആദ്യ സർവിസ് നടത്തിയത്. പിന്നാലെ അഴീക്കൽനിന്ന്​ കരുനാഗപ്പള്ളി ഡിപ്പോയിൽ നിന്നുള്ള ആദ്യ ഓർഡിനറി ബസ് തോട്ടപ്പള്ളിയിലേക്ക് സർവിസ് നടത്തി. കരുനാഗപ്പള്ളി എം.എൽ.എ സി.ആർ. മഹേഷ്​ തോട്ടപ്പള്ളി സർവിസ് ഉദ്ഘാടനം ചെയ്തു. ഹരിപ്പാട് ഡിപ്പോയിൽനിന്ന് നാലും കരുനാഗപ്പള്ളി ഡിപ്പോയിൽനിന്ന് ആറും സർവിസുകളാണ് അനുവദിച്ചത്. അര മണിക്കൂർ ഇടവിട്ട സമയങ്ങളിൽ രാവിലെ അഞ്ച് മുതൽ രാത്രി 10 വരെ തോട്ടപ്പള്ളി -കരുനാഗപ്പള്ളി റൂട്ടിൽ സർവിസ് നടത്തുമെന്നാണ് നേരത്തേ പ്രഖ്യാപിച്ചിരുന്നത്. വരും ദിവസങ്ങളിൽ മാത്രമേ സമയക്രമത്തിൽ തീരുമാനമാകൂവെന്ന്​ കെ.എസ്.ആർ.ടി.സി അധികൃതർ അറിയിച്ചു.