കോവിഡ്​ പ്രതിദിനരോഗികൾ നൂറിൽതാ​ഴെ: ജില്ലയിൽ ആശങ്കയൊഴിഞ്ഞു

ഇന്നലെ 72 പേർക്ക്​ കോവിഡ്​ ആലപ്പുഴ: മൂന്നാം തരംഗത്തിൽ പ്രതിദിനകോവിഡ്​ രോഗികളുടെ എണ്ണം നൂറിൽതാഴെ. ആശുപത്രിയിൽ കഴിയുന്നവർ 783പേർ. ഞായറാഴ്ച ജില്ലയിൽ 72 പേര്‍ക്കാണ്​ കോവിഡ് സ്ഥിരീകരിച്ചത്​. ഇതിൽ 69 പേര്‍ക്കും സമ്പർക്കത്തിലൂടെയാണ്​ രോഗം. മൂന്ന് പേരുടെ സമ്പര്‍ക്ക ഉറവിടം വ്യക്തമല്ല. 163 പേര്‍ രോഗമുക്തരായി. പ്രതിദിനരോഗികളു​ടെ എണ്ണം വെള്ളിയാഴ്ച 87ഉം ശനിയാഴ്​ച 90 ആയി കുറഞ്ഞിരുന്നു. ഇത്​ മൂന്നാംതരംഗം ശമിക്കുന്നതിന്‍റെ സൂചനയാണെന്നാണ്​ ആരോഗ്യപ്രവർത്തകർ പറയുന്നത്​. മൂന്നാം തരംഗം ജില്ലയിൽ പിടിമുറുക്കിയ ഒന്നരമാസം മുമ്പ്​ പ്രതിദിനരോഗികളുടെ എണ്ണം 3000 കടന്നിരുന്നു.​ അന്ന്​ കാര്യങ്ങൾ കൈവിട്ടുപോ​യോയെന്ന ആശങ്കയിൽ തുടർച്ചയായ മൂന്നു ദിവസമാണ്​ ആരോഗ്യവിഭാഗം ടി.പി.ആർ പുറത്തുവിടാതിരുന്നത്​. സെർവർ തകരാറാണെന്നായിരുന്നു വിശദീകരണം. പ്രതിദിന രോഗസ്ഥിരീകരണം മൂവായിരത്തിന്​ മുകളിലെത്തിയ ദിവസങ്ങളിൽ ഇടക്കുനിർത്തിയ ചികിത്സ, പരിചരണ സംവിധാനങ്ങൾ വീണ്ടും തുറക്കാൻ വരെ ആലോചനയുണ്ടായി. സ്കൂളുകൾ അടച്ചിടേണ്ട സാഹചര്യം പോലും വന്നു. പിന്നീട്​ ആശ്വാസമായി ജില്ലയിൽ കണക്കുകൾ താഴേക്ക്​ വന്നു. കണക്കുകളിൽ ഏറ്റക്കുറച്ചിലുണ്ടായിരുന്നെങ്കിലും ആശങ്കയുണ്ടാക്കാതെയാണ്​ ഇ​പ്പോൾ നൂറിൽ താഴ്ന്നത്​. പൊതുപരിപാടികൾ അനുവദിച്ചിട്ടും ജില്ലയിലെ വ്യാപനത്തോത് ഉയർന്നില്ല. ഇനിയും ജാഗ്രത തുടരണമെന്നാണ്​ ആരോഗ്യവകുപ്പിന്‍റെ നിർദേശം. മാസ്കും സാനിറ്റൈസറും സാമൂഹിക അകലവും തുടരണം. മൂന്നാം തരംഗത്തിലാണ്​ രോഗം വ്യാപകമായി ബാധിച്ചത്​. രണ്ടാംതരംഗത്തിൽ മരണങ്ങളുടെ എണ്ണത്തിലും വൻവർധനവാണുണ്ടായത്​. ഈവർഷം ജനുവരിയിൽ പ്രതിദിന രോഗികളുടെ എണ്ണം 2000വും കടന്നാണ്​ മുന്നേറിയത്​. ചികിത്സയിൽ കഴിഞ്ഞവരുടെ എണ്ണവും ഉയർന്നു. ഫെബ്രുവരി അവസാനം മുതൽ പതിയെ രോഗികളുടെ എണ്ണത്തിൽ കുറവുണ്ടായി. കഴിഞ്ഞ മേയ്​ അഞ്ചിനും രോഗികളുടെ എണ്ണം മൂവായിരം കടന്നിരുന്നു​ (3045). എന്നാൽ, പിന്നീട്‌ രോഗികളുടെ എണ്ണത്തിൽ കുറവുണ്ടായി. ജൂണിൽ ആയിരത്തിൽ താഴെയായി. ആഗസ്റ്റിലും സെപ്​റ്റംബറിലും ആയിരം കടന്നെങ്കിലും ഒക്‌ടോബറിൽ അഞ്ഞൂറിൽ താഴെയായി. പിന്നീട്​ മുന്നൂറായും കുറഞ്ഞു. വുഹാനിൽ നിന്നെത്തിയ മെഡിക്കൽ വിദ്യാർഥിക്ക്‌ രോഗം സ്ഥിരീകരിച്ചതാണ്‌ ജില്ലയിലെ ആദ്യ കോവിഡ്‌ കേസ്‌. lead 2