ത്യാഗപൂർണ യാത്രയിലൂടെ റഹ്മത്ത് നാട്ടിലെത്തി

ചെങ്ങന്നൂർ: നാട്ടിലെത്തിയ സന്തോഷത്തിലാണ് മാന്നാർ കുരട്ടിശ്ശേരി വിഷവർശ്ശേരിക്കര റഹ്മത്ത് മൻസിൽ പി.ജെ. ഷാജി-ബീന ദമ്പതികളുടെ മകളായ റഹ്മത്ത്. യുക്രെയ്​നിലെ സപോരിസ്യ സ്റ്റേറ്റ് മെഡിക്കൽ യൂനിവേഴ്സിറ്റിയിൽ മൂന്നാംവർഷ എം.ബി.ബി.എസ് വിദ്യാർഥിനിയായിരുന്നു. യുക്രെയ്​നിലെ സപോരിസ്യയിൽനിന്ന്​ അഞ്ചുദിവസത്തോളം യാത്ര ചെയ്ത് വെള്ളിയാഴ്ച രാത്രിയാണ് നെടുമ്പാശ്ശേരിയിൽ എത്തിയത്​. സപോരിസ്യയിൽനിന്ന്​ 34 മണിക്കൂർകൊണ്ട് ഹംഗറിയിലത്തിയ ശേഷം ഡൽഹിയിലും തുടർന്ന് നെടുമ്പാശ്ശേരിയിലും വന്നിറങ്ങുകയായിരുന്നു. ഒരാഴ്ചയായി യൂനിവേഴ്സിറ്റിയുടെ ഡീൻ ഓഫിസ് ബങ്കറിലും മറ്റും കഴിഞ്ഞിരുന്ന എഴുപതോളം മലയാളികൾ ഉൾപ്പെടെയുള്ള ആയിരത്തിഅഞ്ഞൂറോളം ഇന്ത്യക്കാരായ വിദ്യാർഥികളാണ് വെള്ളിയാഴ്ച ഡൽഹിയിലെത്തിയത്.