കല്ലുകടിയായി ജി. സുധാകര‍െൻറ കത്ത്; സംഘടനാപരമല്ലെന്ന്​ പാർട്ടി വിലയിരുത്തൽ

കല്ലുകടിയായി ജി. സുധാകര‍ൻെറ കത്ത്; സംഘടനാപരമല്ലെന്ന്​ പാർട്ടി വിലയിരുത്തൽ ആലപ്പുഴ: സംസ്ഥാന കമ്മിറ്റിയിൽനിന്ന്​ തന്നെ ഒഴിവാക്കണമെന്ന ജി. സുധാകര‍ന്‍റെ പാർട്ടി സെ​ക്രട്ടറിക്കുള്ള കത്ത്​ സംഘടനാപരമല്ലെന്ന്​ സി.പി.എം വിലയിരുത്തൽ. അതേസമയം, ഇത്​ മാന്യമായ ജി. സുധാകര‍ന്‍റെ 'പടിയിറക്ക'ത്തിന്​ മങ്ങലായേക്കും. സംസ്ഥാന കമ്മിറ്റിയിൽനിന്ന്​ ഒഴിവാക്കാനല്ല തീരുമാനമെങ്കിലും കത്ത്​ കല്ലുകടിയാണ്​. ഒഴിവാക്കിയാലും നിലനിർത്തിയാലും ഈ നീക്കം വാർത്താപ്രാധാന്യം നേടുമെന്നതാണ്​ ഫലം. രൂക്ഷവിഭാഗീയത കത്തിനിൽക്കുന്ന ആലപ്പുഴ ജില്ലയിൽ ഇതിന്‍റെ ഭാഗമാകാതെ സമ്മേളനകാലയളവിൽ നിൽക്കാനായത്​ സ്വീകാര്യതയാകുമ്പോൾ തന്നെയാണ്​ മനസ്സിലിരുപ്പ്​ മറച്ചുപിടിച്ച്​ സംസ്ഥാന കമ്മിറ്റിയിൽനിന്ന്​ തന്നെ ഒഴിവാക്കണമെന്ന ആവശ്യം മുന്നോട്ടുവെച്ച്​ പ്രതിച്ഛായക്ക്​ മങ്ങലേൽപിച്ചെന്നാണ്​ വികാരം. സംസ്ഥാന സമ്മേളനത്തിന്​ തൊട്ടുമുമ്പത്തെ സംസ്ഥാന കമ്മിറ്റിയിലെങ്കിലും വേണമായിരുന്നു ഇത്തരം ഇടപെടലെന്ന്​ മുതിർന്ന നേതാവെന്ന നിലയിൽ അറിയാത്തതല്ല സുധാകരന്​. ആ സ്ഥിതിക്ക്​ സുധാകരന്‍റേത്​ അനാവശ്യനീക്കമെന്ന്​ പാർട്ടി നേതൃത്വം കരുതുന്നു. അനവസരത്തിൽ എഴുതിയ കത്ത്​ നേതൃത്വത്തിന്​ അലോസരമുണ്ടാക്കിയിട്ടുമുണ്ട്​. രേഖാപരമായി തനിക്ക്​ 75 വയസ്സ്​​ ആയിട്ടില്ലെന്നും കത്തിൽ പരാമർശമുണ്ടെന്നാണ്​ സൂചന. പ്രായം മാത്രമല്ല പരിഗണിക്കുകയെന്നും മറ്റ്​ പലഘടകങ്ങളും സ്വാധീനിക്കുമെന്നുമാണ്​ സംസ്ഥാന സെ​ക്രട്ടറി കോടിയേരി ബാലകൃഷ്ണ‍ന്‍റെ ഇക്കാര്യത്തിലെ പ്രതികരണം. ഒരുകൂട്ടം പേർ ഒഴിവായാൽ മാത്രമേ പുതിയവർക്ക്​ കടന്നുവരാൻ കഴിയൂ എന്നും കോടിയേരി കൂട്ടിച്ചേർക്കുന്നു. നിയമസഭ തെരഞ്ഞെടുപ്പിൽ സീറ്റ്​ നിഷേധിക്കപ്പെട്ട സുധാകരൻ സ്വന്തം മണ്ഡലമായ അമ്പലപ്പുഴയിലെ തെരഞ്ഞെടുപ്പ്​ പ്രവർത്തനങ്ങളിൽ കടുത്ത അലംഭാവം കാട്ടിയെന്ന്​ പാർട്ടി നിയോഗിച്ച അന്വേഷണ കമീഷൻ കണ്ടെത്തിയിരുന്നു. മണ്ഡലത്തിൽ എച്ച്​. സലാം വിജയിച്ചെങ്കിലും സുധാകരനെതിരെ പരാതി ഉയർന്നു. എന്നാൽ, ശിക്ഷ താക്കീതിൽ ഒതുക്കി. പ്രമുഖ നേതാവായ സുധാകരനെ പ്രായം കണക്കിലെടുത്ത്​ ഒഴിവാക്കിയാലും ക്ഷണിതാവായി ഉൾപ്പെടുത്തുന്നതിന്​ സാധ്യത ഉണ്ടായിരിക്കെയാണ്​ കത്ത്​. സംസ്ഥാന കമ്മിറ്റിയിൽനിന്ന്​ പുറത്തുപോകേണ്ടി വരുമെന്ന്​ ഉറപ്പായ സാഹചര്യത്തിലാണോ ഭാഗ്യപരീക്ഷണമെന്നോണം സുധാകരന്‍റെ നീക്കമെന്ന് സംശയിക്കുന്നു.​