എ.സി റോഡ്​ നവീകരണം: നിയന്ത്രണങ്ങൾ പാളി; നട്ടംതിരിഞ്ഞ്​ യാത്രക്കാർ

നിർമാണം നടക്കുന്ന സ്ഥലങ്ങളിൽ ഒറ്റവരി പാത കുട്ടനാട്: ആലപ്പുഴ-ചങ്ങനാശ്ശേരി റോഡ് നവീകരണ ഭാഗമായി ഏർപ്പെടുത്തിയ നിയന്ത്രണങ്ങൾ പാളിയതോടെ പലയിടത്തും ഗതാഗതക്കുരുക്ക്​ രൂക്ഷം. നിർമാണം നടക്കുന്ന സ്ഥലങ്ങളിൽ അര കിലോമീറ്റോളം വീതികുറഞ്ഞ ഒറ്റവരി റോഡിലൂടെയാണ്​ വാഹനങ്ങൾ കടത്തിവിടുന്നത്​. ഒരുകാറും എതിര്‍വശത്തുനിന്ന്​ ഒരുബൈക്കും കടന്നെത്തിയാൽ ഗതാഗതം താറുമാറാകുന്ന സ്ഥിതിയാണ്​. മണ്ണിട്ട് ഉറപ്പിച്ച റോഡില്‍ കല്ലിളകി പല ഭാഗങ്ങളിൽ കുഴികളും രൂപപ്പെട്ടിട്ടുണ്ട്​. മങ്കൊമ്പ് ഒന്നാംകരക്കും ബ്ലോക്ക് ജങ്​ഷനും ഇടയില്‍ മേല്‍പാലം നിര്‍മിക്കുന്ന ഭാഗത്താണ് ഗതാഗതക്കുരുക്ക് രൂക്ഷം. ദിവസങ്ങളായി ഇവിടെ വാഹനങ്ങള്‍ കുരുക്കില്‍പെട്ടിട്ടും പരിഹാരമാര്‍ഗങ്ങളില്ലാത്തതും യാത്രക്കാരെ വലക്കുന്നുണ്ട്​. മിക്ക ദിവസങ്ങളിലും രോഗികളുമായി പോകുന്ന ആംബുലൻസ്​ കുരുക്കിൽപെട്ട്​ നട്ടംതിരിയാറുണ്ട്​. കഴിഞ്ഞദിവസം മാമ്പുഴക്കരിയിലെ നിർമാണസ്ഥലത്ത്​ ട്രെയിലർ കുടുങ്ങിയത്​ മണിക്കൂറുകളോളമാണ്​ ഗതാഗതക്കുരുക്ക്​ സൃഷ്ടിച്ചത്​. വാഹനങ്ങളുടെ നീണ്ടനിര കിലോമീറ്ററുകൾ വരെ നീളാറുണ്ട്​. പാലം നിർമാണവുമായി ബന്ധപ്പെട്ട്​ മ​ങ്കൊമ്പ്​ പാലംവരെയാണ്​ ചങ്ങനാശ്ശേരിയിൽനിന്നുള്ള ബസുകൾ സർവിസ്​ നടത്തുന്നത്​. യാത്രക്കാർ കാൽനടയായി താൽക്കാലിക പാലത്തിലൂടെ കടന്നെത്തിയാലും ആലപ്പുഴയിലേക്കുള്ള ബസുകൾ സമയത്ത്​ കിട്ടാറില്ല. ഓട്ടോ അടക്കമുള്ള മറ്റ്​ വാഹനങ്ങളെ ആശ്രയിച്ചാൽ ലക്ഷ്യസ്ഥാനത്ത്​ എത്താൻ മണിക്കൂറുകൾ വേണ്ടിവരുന്ന സ്ഥിതിയാണ്​. സ്കൂൾ സജീവമായിട്ടും ബസ്​ സർവിസുകൾ കാര്യക്ഷമമല്ലെന്ന പരാതിയുണ്ട്​. റോഡും മേൽപാലവും നിർമിക്കുന്ന സ്ഥലത്തെ നിർമാണത്തിൽ വാഹനങ്ങൾ കിലോമീറ്ററുകൾ ഇഴഞ്ഞുനീങ്ങുന്ന സ്ഥിതിയാണ്​. കുരുക്ക്​ അഴിയാൻ ചിലസമയങ്ങളിൽ അരമണിക്കൂറിലേറെ കാത്തുകിടക്കേണ്ടി വരും. അത്യാധുനിക രീതിയിൽ റോഡ്​ നിർമാണം ആരംഭിച്ച മനക്കച്ചിറ-കിടങ്ങറ ഈസ്​റ്റ്​ ഭാഗത്ത്​ നിലവിലെ ടാറിങ്​ ഇളക്കി മാറ്റിയാണ്​ ജോലി പുരോഗമിക്കുന്നത്​. മ​ങ്കൊമ്പ്​ ബ്ലോക്ക്​ ജങ്​ഷൻ, ഒന്നാംകര, മ​​ങ്കൊമ്പ്​ തെക്കേക്കര, പാറശ്ശേരി-ജ്യോതി ജങ്​ഷൻ, നെടുമുടി തുടങ്ങിയ സ്ഥലങ്ങളിൽ ഒരുവശത്തുകൂടിയാണ്​ വാഹനം കടത്തിവിടുന്നത്​. നിര്‍മാണസ്ഥലത്ത് ചില ഭാഗങ്ങളില്‍ രാത്രിയില്‍ വാഹനങ്ങള്‍ നിയന്ത്രിക്കാന്‍ ജീവനക്കാരില്ലാത്തതും പ്രതിസന്ധിയാകുന്നുണ്ട്. റോഡ് ഗതാഗതത്തിനൊപ്പം ജലഗതാഗതവും തടസ്സം നേരിടുന്നതിനാൽ കുട്ടനാട്ടുകാരുടെ യാത്ര​ക്ലേശം ഇരട്ടിയായി. മാമ്പുഴക്കരി പാലത്തിന് സമാന്തരമായി മുമ്പ്​ നിർമിച്ചിരുന്ന നടപ്പാലം പൊളിച്ചു നീക്കിയിരുന്നു. ഇതിന്‍റെ അവശിഷ്ടങ്ങള്‍ ജലാശയത്തില്‍ കിടക്കുകയാണ്. ഇവ പൂര്‍ണമായും നീക്കാത്തതിനാൽ ജലഗതാഗതത്തിന്​ തടസ്സം നേരിടുന്നുണ്ട്​. ലോഡുമായെത്തുന്ന വള്ളങ്ങള്‍ ഏറെ നേരത്തെ പരിശ്രമത്തിന് ശേഷമാണ് ഇവിടം കടക്കുന്നത്. വള്ളം മറിയാനും സാധ്യതയുണ്ട്. പാലം പൊളിച്ചപ്പോള്‍തന്നെ അവശിഷ്ടങ്ങളും നീക്കണമെന്ന ആവശ്യം അധികൃതർ പരിഗണിച്ചില്ലെന്ന്​ പരാതിയുണ്ട്​. APL ac road block എ.സി റോഡിൽ മങ്കൊമ്പ് ഒന്നാം കരയിലെ ഗതാഗതക്കുരുക്ക്​ lead pege3