പൊളിച്ച റോഡുകൾ മാസങ്ങള്‍ പിന്നിട്ടിട്ടും അതേപടി

അമ്പലപ്പുഴ: പൊളിച്ച റോഡുകളിലെ നിർമാണം പൂർത്തിയാക്കാത്തത് നാട്ടുകാരെ വലക്കുന്നു. പുന്നപ്ര തെക്ക് പഞ്ചായത്തിലെ 4, 6, 8 വാർഡുകളിലെ പാതകളാണ്​ പുനര്‍നിര്‍മാണത്തിനായി പൊളിച്ചിട്ടിരിക്കുന്നത്. കഴിഞ്ഞ നിയമസഭ തെരഞ്ഞെടുപ്പിന് മുമ്പായിരുന്നിത്​. വർഷങ്ങളായി പൊട്ടിപ്പൊളിഞ്ഞ്​ സഞ്ചാരയോഗ്യമല്ലാതെ കിടന്ന റോഡുകളിൽ പ്രദേശവാസികളുടെ നീണ്ട പരാതിയെ തുടർന്നാണ് പണി ആരംഭിച്ചത്. ഇപ്പോൾ ഇരുചക്ര വാഹനങ്ങളടക്കം കല്ലിൽ തട്ടി മറിയുന്നത്​ പതിവാണ്. റോഡ്​ പൊളിച്ചിട്ടിരിക്കുന്നതിനാൽ അടിയന്തരഘട്ടത്തിൽ രോഗികളെ ആശുപത്രിയിൽ എത്തിക്കാൻ ഓട്ടോപോലും എത്താറില്ല. പരാതിപ്പെടുമ്പോൾ ഇടക്ക്​ കുറച്ച്​ ഗ്രാവൽ നിരത്തി വെള്ളമൊഴിച്ച്​ ഉറപ്പിച്ചശേഷം തൊഴിലാളികൾ പോയാൽ പിന്നെ ഒരു വിവരവുമില്ലെന്ന് നാട്ടുകാർ പറയുന്നു. കഴിഞ്ഞ ദിവസം അറവുകാട് ദലിത്​ കോളനി റോഡ്​ കുത്തിപ്പൊളിച്ചപ്പോൾ സി.പി.എം മുൻബ്രാഞ്ച്​ സെക്രട്ടറി സാബുവി‍ൻെറ നേതൃത്വത്തിൽ യന്ത്രം തടഞ്ഞിരുന്നു. സമയബന്ധിതമായി നിർമാണം പൂർത്തിയാക്കണമെന്നായിരുന്നു ജനത്തിന്റെ ആവശ്യം. തുടർന്ന് കരാറുകാരന്റെ ഉറപ്പിലാണ് റോഡ്​ പൊളി തുടങ്ങിയത്. അതേസമയം, ഉടൻ പണി ആരംഭിക്കുമെന്നാണ് കരാര്‍ ജീവനക്കാര്‍ പറയുന്നത്. ചിത്രം.. അറവുകാട്-ഗുരുപാദം റോഡ് പൊളിച്ചിട്ടിരിക്കുന്നു