അർബുദരോഗികൾക്ക്​ മുടി മുറിച്ചുനൽകി സഹോദരങ്ങൾ

അമ്പലപ്പുഴ: നീട്ടി വളർത്തിയ മുടി കാൻസർ രോഗികൾക്കായി മുറിച്ചുനൽകി സഹോദരങ്ങൾ. കളർകോട് യു.പി സ്കൂൾ വിദ്യാർഥികളും പുന്നപ്ര വടക്ക് പഞ്ചായത്ത് പേരൂർ കോളനിയിൽ അജിലാൽ - ശാലിനി ദമ്പതികളുടെ മക്കളുമായ അശ്വിൻലാൽ (13), അഭിനന്ദ് ലാൽ (9) എന്നിവരാണ്​ രണ്ടു വർഷത്തിലധികമായി നീട്ടി വളർത്തിയ മുടി മുറിച്ചത്. ഏഴിലും നാലിലും പഠിക്കുന്ന ഇവർ ടി.വി ചാനൽ പരിപാടിക്കിടെയാണ് മുടി മുറിച്ച് അർബുദ രോഗികൾക്ക്​ വിഗ് നിർമാണത്തിന് നൽകുന്നത് ശ്രദ്ധയിൽപ്പെട്ടത്. കോവിഡ് കാലത്ത് സ്കൂളിൽ പോകാൻ പറ്റാതായത് മുടി വളർത്തിന് സഹായമായതായി ഇരുവരും പറഞ്ഞു. തൃശൂർ കേന്ദ്രമായി പ്രവർത്തിക്കുന്ന മിറാക്കിൾ ചാരിറ്റബിൾ സംഘടനയുടെ ഹെയർ ബാഗിലേക്കാണ്​ മുടി നൽകിയത്​. ചിത്രം: മുറിച്ച മുടിയുമായി അശ്വിൻലാലും അഭിനന്ദ് ലാലും