വൈദ്യുതി പോസ്​റ്റുകളിലടക്കം നഗരത്തിൽ അഞ്ചിടത്ത്​ തീപിടിത്തം

ആലപ്പുഴ: വേനൽകനത്തതോടെ വൈദ്യുതി പോസ്റ്റുകളിലടക്കം നഗരത്തിൽ അഞ്ചിടത്ത്​ തീപിടിച്ചു. ശനിയാഴ്​ച രാത്രി ഒമ്പതിനും 11.10നും ആര്യാട്​ തലവടി പള്ളിമുക്കിലും ആലപ്പുഴ ചുങ്കത്തിനടുത്തെ​​ പോസ്റ്റുകൾക്കുമാണ്​ തീപിടിച്ചത്​. അഗ്നിരക്ഷാസേനയെത്തിയാണ്​ തീയണച്ചത്​. ഞായറാഴ്​ച ഉച്ചക്ക്​ 1.35നായിരുന്നു മൂന്നാമത്തെ തീപിടിത്തം. ആലപ്പുഴ കൈചുണ്ടിമുക്കിന് സമീപം അവലകുന്നിൽ കൂട്ടിയിട്ട മാലിന്യത്തിനും സമീപത്തെ പറമ്പിലെ പുല്ലിനും തീപിടിക്കുകയായിരുന്നു. സമീപത്ത്​ വീടുകൾ ഉള്ളതിനാൽ പരിഭ്രാന്തി പരത്തി. അഗ്നിരക്ഷാസേനയെത്തിയാണ്​ അപകടം ഒഴിവാക്കിയത്​. ഉച്ചക്ക്​ 2.45നായിരുന്നു നാലാമത്തെ തീപിടിത്തം. ആലപ്പുഴ വട്ടയാൽ പള്ളിക്ക് സമീപത്തെ പറമ്പിലെ പുല്ലിനാണ്​ തീപിടിച്ചത്​​. സമീപത്തായി വാഹനങ്ങൾ പാർക്ക് ചെയ്തിരുന്നു. നാട്ടുകാർ നൽകിയ വിവരമനുസരിച്ച്​ ഇവിടെയും സേനയെത്തിയാണ്​ തീകെടുത്തിയത്​. ആലപ്പുഴ വഴിച്ചേരി മുസ്​ലിംപള്ളിക്ക് സമീപത്തെ പറമ്പിൽ കൂട്ടിയിട്ടിരുന്ന മാലിന്യത്തിനും തീപിടിച്ചു. ഞായറാഴ്ച വൈകീട്ട്​ 4.35നായിരുന്നു സംഭവം. സമീപത്തായി ടെക്സ്റ്റയിൽസ്​ ഉണ്ടായിരുന്നതിനാൽ പരിഭ്രാന്തി പരന്നു. അഗ്നിരക്ഷാസേനയെത്തിയാണ്​ തീകെടുത്തിയത്​. അസി. സ്​റ്റേഷൻ ഓഫിസർ അനികുമാറിന്റെ നേതൃത്വത്തിൽ ജി. ഷൈജു, ആർ.ഡി. സനൽകുമാർ, ജെ.എസ്​. ശ്രീജിത്ത്, ഷുഹൈബ്, അഖിലേഷ്, കെ.എസ്​. ആന്റണി എന്നിവർ രക്ഷാപ്രവർത്തനത്തിന്​ നേതൃത്വം നൽകി. കാറിടിച്ച്​ തെരുവുനായുടെ കാലൊടിഞ്ഞു; രക്ഷകനായി ജയകുമാർ ആലപ്പുഴ: കാറിടിച്ച് കാലെടിഞ്ഞ തെരുവുനായ്​ക്ക്​ രക്ഷയൊരുക്കി മൃഗസ്​നേഹി ജയകുമാർ. ആലപ്പുഴ വഴിച്ചേരി സപ്ലൈകോ പെട്രോൾ പറമ്പിന്​ സമീപത്തുവെച്ചാണ്​ തെരുവുനായുടെ വലത്തെ കാലിലൂടെ കാർ കയറിയത്. ​വേദനകൊണ്ട്​ പുളഞ്ഞ നായെ രക്ഷിക്കണമെന്ന ആവശ്യമായി പെട്രോൾ പമ്പ്​ ജീവനക്കാർ ജയദേവനെ വിളിക്കുകയായിരുന്നു. കാറുമായി വഴിച്ചേരി പമ്പിലെത്തി ജയകുമാർ നായെ ജില്ല മൃഗാശുപത്രിയിൽ എത്തിച്ചു. അടിയന്തര ചികിത്സക്കൊപ്പം കാലിൽ പ്ലാസ്റ്ററിട്ടശേഷം പമ്പിന് സമീപത്ത് വിട്ടയച്ചു. പമ്പിലെയും പരിസരത്തെയും ആളുകളാണ് നായ്​ക്ക് ഭക്ഷണവും മറ്റും നൽകി സംരക്ഷിക്കുന്നത്. തിങ്കളാഴ്ച വീണ്ടും ആശുപത്രിയിൽ എത്തിക്കണമെന്ന് ഡോക്ടർമാർ നിർദേശിച്ചിട്ടുണ്ട്. അപകടത്തിൽപെടുന്ന മൃഗങ്ങളെ സംരക്ഷിക്കാനും ശുശ്രൂഷിക്കാനും ജയകുമാർ എപ്പോഴും സന്നദ്ധനാണ്​. ഒരുവിളിയെത്തിയാൽ മതിയെന്ന്​ മാത്രം.