മീഡിയവൺ നിരോധനം അപലപനീയം -കെ.പി.എ. മജീദ്

കായംകുളം: പത്രസ്വാതന്ത്ര്യം ഇല്ലാതാക്കുന്ന രാജ്യത്തെ സാഹചര്യം അപകടകരമാണെന്ന് മുസ്‌ലിം ലീഗ് മുൻ സംസ്ഥാന ജനറൽ സെക്രട്ടറി കെ.പി.എ. മജീദ് പറഞ്ഞു. കായംകുളത്ത് മാധ്യമപ്രവർത്തകരുമായി സംസാരിക്കുകയായിരുന്നു അദ്ദേഹം. അടിയന്തരാവസ്ഥക്കാലത്തു പോലും ഉണ്ടാകാത്ത അനുഭവമാണിത്. നോട്ടീസ്​പോലും നൽകാതെ മീഡിയവൺ പൂട്ടിയത് അംഗീകരിക്കാനാവില്ല. പച്ചയായ രാഷ്ട്രീയം പറയുന്ന ഗവർണർ കേരളത്തിന് ആദ്യാനുഭവമാണ്. ആർ.എസ്.എസിനു വേണ്ടിയാണ് ഗവർണർ പ്രവർത്തിക്കുന്നത്. ഗവർണറും മുഖ്യമന്ത്രിയും തമ്മിൽ ഒത്തുകളിക്കുകയാണ്. വഖഫ് ബോർഡ് നിയമന വിഷയത്തിൽ മുഖ്യമന്ത്രി ഉറപ്പ് പാലിക്കണമെന്നും അദ്ദേഹം ആവശ്യപ്പെട്ടു.