ആശുപ​ത്രികളെ സുരക്ഷിത മേഖലയായി പ്രഖ്യാപിക്കണം -ഐ.എം.എ

ആലപ്പുഴ: ഡോക്ടർമാർക്കും ആശുപത്രികൾക്കും നേരെ തുടരെ ആക്രമണമുണ്ടാകുന്നതിനാൽ ആശുപത്രികളെ സുരക്ഷിത മേഖലയായി പ്രഖ്യാപിക്കണമെന്ന്​ ഐ.എം.എ ജില്ല കമ്മിറ്റി ഭാരവാഹികൾ വാർത്തസമ്മേളനത്തിൽ ആവശ്യപ്പെട്ടു. ആശുപത്രിയിൽ അക്രമണം തടയുന്നതിൽ സർക്കാർ പരാജയപ്പെട്ടു. രണ്ടുവർഷത്തിനകം വനിതകൾ ഉൾ​പ്പെടെ നൂറിലധികം ഡോക്ടർമാരാണ്​ സംസ്ഥാനത്തെ വിവിധഭാഗങ്ങളിൽ ആക്രമിക്കപ്പട്ടത്​. മാവേലിക്കര താലൂക്ക്​ ആശുപത്രിയിലും നൂറനാടും ഡോക്ടറെയും ആക്രമിച്ചകേസിൽ പ്രതികൾ പൊലീസുകാരാണ്​. ആലപ്പുഴ മെഡിക്കൽ കോളജിൽ വനിത ഹൗസ്​ സർജനെ ആക്രമിച്ചകേസിൽ പൊലീസ്​ ഗൺമാനെയും അറസ്റ്റ്​ ചെയ്തിട്ടില്ല. പൊലീസ്​ അറസ്റ്റ്​ വൈകിച്ച്​ കൂടുതൽ​ സമയം നൽകി പ്രതികൾക്ക്​ മുൻകൂർ ജാമ്യം എടുക്കാൻ അവസരം ഒരുക്കി കൊടുക്കുകയാണ്​. ഇതിനെതിരെ പലതവണ പരാതിപ്പെട്ടിട്ടും ഉന്നത ഉദ്യോഗസ്ഥർ നിസ്സംഗത പാലിക്കുകയാണെന്ന്​ നേതാക്കൾ കുറ്റപ്പെടുത്തി. വാർത്തസമ്മേളനത്തിൽ ജില്ല ചെയർമാൻ ഡോ. എ.പി. മുഹമ്മദ്​, മുൻ സംസ്ഥാന ​പ്രസിഡന്‍റ്​​ ഡോ.പി.ടി. സക്കറിയ, ആലപ്പുഴ ബ്രാഞ്ച്​ പ്രസിഡന്‍റ്​​ ഡോ. മദന മോഹനൻ നായർ, ഡോ. ടി.കെ. സുദീപ്​ എന്നിവർ പ​ങ്കെടുത്തു.