സാമൂഹിക വിരുദ്ധരുടെ ആക്രമണം: സി.പി.എം ലോക്കൽ കമ്മിറ്റിയംഗത്തിന്​ ഗുരുതരപരിക്ക്​

ചെങ്ങന്നൂർ: സാമൂഹിക വിരുദ്ധരുടെ ആക്രമണത്തിൽ സി.പി.എം തിരുവൻവണ്ടൂർ ലോക്കൽ കമ്മിറ്റി അംഗത്തിന്​ മർദനമേറ്റു. ഗുരുതര പരിക്കേറ്റ ഉമയാറ്റുകര പാലപ്ര പള്ളത്ത് ശരത് മോഹനെ (29) ചെങ്ങന്നൂർ ജില്ല ആശുപത്രിയിൽ പ്രവേശിപ്പിച്ചു. കഴിഞ്ഞ ദിവസം രാത്രി ഒമ്പതിന്​ കല്ലിശ്ശേരി ബി.ബി.സി ഓഡിറ്റോറിയത്തിന്​ സമീപം അഞ്ചു ബൈക്കുകളിലായി എത്തിയ പത്തംഗ സംഘമാണ് ആക്രമിച്ചത്. ആക്രമണത്തിൽ ശരത്തിന്‍റെ തലയ്ക്കും പുറത്തും ഗുരുതരമായി പരിക്കേറ്റു. തുടർന്ന്​ പ്രതികൾ സ്ഥലത്തുനിന്നും രക്ഷപ്പെട്ടു. തിരുവൻവണ്ടൂരിന്‍റെ വിവിധ ഭാഗങ്ങളിൽ ഈ സംഘം ഞായറാഴ്ച രാത്രി എത്തി ഭീഷണി മുഴക്കിയതായി പരാതിയുണ്ട്. സി.സി.ടി.വി ദൃശ്യങ്ങൾ പരിശോധിച്ച് ചെങ്ങന്നൂർ പൊലീസ് നടത്തിയ അന്വേഷണത്തിൽ പ്രതികളെന്ന്​ കരുതുന്ന ചിലരെ പിടികൂടിയിട്ടുണ്ട്.