വാഹന പണയം വെച്ച് തട്ടിപ്പ്; രണ്ടുപേർ അറസ്റ്റിൽ

പൂച്ചാക്കൽ: വാഹനം പണയം വെച്ച് തട്ടിപ്പ് നടത്തുന്ന രണ്ടുപേർ അറസ്റ്റിൽ. പാണാവള്ളി തൃച്ചാറ്റുകുളം വടക്കേ വെളീത്തറ അനസ് (38), പൂച്ചാക്കൽ സൈനബ മൻസിലിൽ നിഹാസ് (21)എന്നിവരെയാണ്​ പൂച്ചാക്കൽ പൊലീസ്​ അറസ്റ്റ് ചെയ്​തത്​. വാഹനം പണയം വെച്ചശേഷം ഡ്യൂപ്ലിക്കറ്റ് താക്കോൽ ഉപയോഗിച്ച്​ കടത്തിക്കൊണ്ടുപോയി തട്ടിപ്പ് നടത്തുന്ന സംഘത്തിലുള്ളവരാണിവർ. ചേർത്തല ഡിവൈ.എസ്.പി ടി.ബി. വിജയന്റെ നേതൃത്വത്തിലുള്ള സംഘമാണ്​ പ്രതികളെ പിടികൂടിയത്​. കൊല്ലം സ്വദേശിനിയായ വീട്ടമ്മ ഡിവൈ.എസ്.പിക്ക് നൽകിയ പരാതിയുടെ അടിസ്ഥാനത്തിലാണ്​ കേസെടുത്തത്​. പരാതിക്കാരിയുടെ കൈയിൽനിന്ന്​ 2,75,000 രൂപ വാങ്ങിയ ശേഷം അവർക്ക് കാർ നൽകുകയും നാലുദിവസത്തിനുശേഷം പരാതിക്കാരിയുടെ വീട്ടിൽനിന്ന്​ ഡ്യൂപ്ലിക്കേറ്റ് താക്കോൽ ഉപയോഗിച്ച് കടത്തിക്കൊണ്ട് പോകുകയായിരുന്നു. പ്രതികളെ കോടതിയിൽ ഹാജരാക്കി റിമാൻഡ് ചെയ്തു. കേസിൽ കൂടുതൽ പ്രതികളുണ്ടെന്നും അവർ ഉടൻ പിടിയിലാകുമെന്നും പൊലീസ്​ അറിയിച്ചു. ചിത്രം : അറസ്റ്റിലായ അനസ്, നിഹാസ്