അരൂരിൽ വാഹനാപകടങ്ങൾ

അരൂർ: കഴിഞ്ഞ രാത്രിയുണ്ടായ വേനൽമഴയിൽ ദേശീയപാതയിൽ അരൂർ മേഖലയിൽ വാഹനാപകടങ്ങളുടെ പെരുമഴ. മണിക്കൂറുകളുടെ വ്യത്യാസത്തിൽ അഞ്ച്​ വാഹനങ്ങളാണ് അപകടത്തിൽപെട്ടത്. ആർക്കും പരിക്കില്ല. കുറച്ചുസമയം ഗതാഗത തടസ്സമുണ്ടായി. എരമല്ലൂർ കവലയിൽ പോസ്റ്റൽ വകുപ്പിന്റെ മെയിൽവാഹനത്തിൽ ലോറി ഇടിച്ച് മെയിൽ വാഹനത്തിന്റെ മുൻഭാഗം തകർന്നു. വാഹനം റോഡിൽനിന്ന്​ സ്റ്റാർട്ട് ചെയ്ത്​ നീക്കാൻ കഴിയാതായതോടെ അരൂരിൽനിന്ന്​ അഗ്നിരക്ഷാസേനയും പൊലീസും സ്ഥലത്തെത്തി വാഹനം പാതയിൽനിന്ന്​ തള്ളിനീക്കുകയായിരുന്നു. തിരുവനന്തപുരത്തുനിന്ന്​ കൊച്ചിയിലേക്ക്​ പോകുകയായിരുന്നു മെയിൽവാഹനം. അരൂരിൽ അബാദ് കോൾഡ് സ്റ്റോറേജിന് സമീപം മഴസമയത്ത് രണ്ട്​ മിനിലോറികൾ വൈദ്യുതി പോസ്റ്റ്​ തകർത്ത് അപകടമുണ്ടായി. അരൂർ ക്ഷേത്രം കവലക്കുസമീപം ഓടിക്കൊണ്ടിരുന്ന ബൈക്കിന്​ തീപിടിച്ചെങ്കിലും ബൈക്ക് യാത്രികൻ പൊള്ളലേൽക്കാതെ രക്ഷപ്പെട്ടു. പെട്രോൾ ടാങ്ക് ചോർന്നതാണ്​ തീപിടിത്തത്തിന്​ കാരണം. അരൂർ അഗ്നിരക്ഷാസേന എത്തിയാണ് തീയണച്ചത്. ചിത്രം അരൂർ അബാദ് കോൾഡ് സ്റ്റോറേജ് സമീപം രണ്ടു പിക്കപ്പ് വാനുകൾ അപകടത്തിൽ പെട്ടപ്പോൾ