ശാന്തിഭവന് സഹായഹസ്തവുമായി ജീവകാരുണ്യ പ്രവര്‍ത്തകന്‍

അമ്പലപ്പുഴ: തെരുവിൽ ഉപേക്ഷിച്ചവരുടെ അഭയകേന്ദ്രമായ പുന്നപ്ര ശാന്തിഭവനിൽ പണിയുന്ന മലിനജല സംസ്ക്കരണ പ്ലാന്‍റിന്‍റെ നിർമാണത്തിന് പൊതുപ്രവർത്തകൻ ധനസഹായം നൽകി. പ്രമുഖ വ്യവസായിയും ജീവകാരുണ്യ-പൊതുപ്രവർത്തന മേഖലയിൽ സജീവ സാന്നിധ്യവുമായ കമാൽ എം.മാക്കിയിലാണ് ശാന്തിഭവന് സഹായഹസ്തവുമായെത്തിയത്. ബുധനാഴ്ച ശാന്തിഭവനിലെത്തിയ കമാല്‍ എം.മാക്കിയില്‍ പ്ലാന്‍റിന്‍റെ നിര്‍മാണ പ്രവര്‍ത്തനങ്ങള്‍ നോക്കിക്കണ്ടു. തുടർന്ന് 25,000 രൂപ അദ്ദേഹം ശാന്തിഭവൻ മാനേജിങ്​ ട്രസ്റ്റി ബ്രദർ മാത്യു ആൽബിന് കൈമാറി. മലിനീകരണ നിയന്ത്രണ ബോർഡിന്‍റെ നിർദേശത്തെ തുടർന്നാണ് ശാന്തിഭവനിൽ മലിന ജല പ്ലാന്‍റ്​ നിർമിക്കുന്നത്. ഇതിന് 20 ലക്ഷം രൂപയോളം ചെലവുവരും. ഇത് സ്വരൂപിക്കാനുള്ള നെട്ടോട്ടത്തിലാണ് ശാന്തിഭവൻ അധികൃതർ. നിലവിൽ 160 ഓളം അന്തേവാസികളാണ് ശാന്തി ഭവനിലുള്ളത്. ഇതിൽ ഭൂരിഭാഗവും മനോനില തകരാറിലായവരാണ്​. ഇവരുടെ ഭക്ഷണത്തിനും മരുന്നിനുമായി ഒരുദിവസം 20,000 രൂപയോളം ചെലവുവരും. ഒരുപാട് സുമനസ്സുകളുടെ സഹായംകൊണ്ടാണ് സ്ഥാപനം മുന്നോട്ടുപോകുന്നതെന്ന്​ ബ്രദർ മാത്യു ആൽബിൻ പറഞ്ഞു. (ചിത്രം.....പ്ലാന്‍റ് നിര്‍മാണത്തിനുള്ള ധനസഹായം കമാല്‍ എം.മാക്കിയില്‍ ശാന്തിഭവന്‍ മാനേജിങ് ട്രസ്റ്റി ബ്രദര്‍ മാത്യു ആല്‍ബിന് കൈമാറുന്നു)