വാഹനാപകടത്തിൽ തർക്കം: സഹായിക്കാനെത്തിയ യുവാവിന്​ മർദനം

ആലപ്പുഴ: റോഡരുകിൽ പാർക്ക്​ ചെയ്​ത ബൈക്കിൽ ​സ്​കൂട്ടർ ഇടിച്ച സംഭവത്തിലുണ്ടായ തർക്കത്തിൽ യുവാവിന്​ മർദനം. സംഘർഷത്തിൽ ഇരുവിഭാഗം ഏറ്റുമുട്ടി നാലുപേർക്ക്​ പരിക്ക്​. അപകടം കണ്ട്​ സഹായിക്കാനെത്തിയ കൊമ്മാടി സ്വദേശി ജിതേഷിനാണ്​ (43) മർദനമേറ്റത്​. ശനിയാഴ്​ച രാത്രിയായിരുന്നു ആലപ്പുഴ ബൈപാസിൽ കൊമ്മാടിയിലാണ്​ സംഭവം. ആലപ്പുഴ ബീച്ച് വാർഡിലെ ഒരു കുടുംബത്തിലെ രണ്ട് കുട്ടികൾ ഉൾപ്പെടെ നാലുപേർ കൊമ്മാടി ബൈപാസ് ജങ്​ഷനിൽ സംസാരിച്ചു നിൽക്കവെ രണ്ട് യുവാക്കൾ സഞ്ചരിച്ച സ്​കൂട്ടർ പാർക്ക് ചെയ്തിരുന്ന ബൈക്ക്​ ഇടിച്ചുതെറിപ്പിച്ചു. തുടർന്ന് ഇരുവരുമായി വാക്​തർക്കമായി. തുടർന്ന് യുവാക്കളുടെ കൂട്ടാളികളായ ചിലർ സ്ഥലത്ത് എത്തിയതോടെ കൂട്ടയടിയായി. വിവരം അറിഞ്ഞ് നോർത്ത് പൊലീസ് സ്ഥലത്ത് എത്തിയാണ്​ സ്ഥിതി ശാന്തമാക്കിയത്​. ഞായറാഴ്​ച രാവിലെ സ്​റ്റേഷനിൽ എത്തി മൊഴിതരണമെന്ന് ഇരുവിഭാഗത്തോടും നിർദേശിച്ച് പരിക്കേറ്റവരെ ബന്ധുക്കളോടൊപ്പം കൂട്ടിവിട്ടു. സംഘർഷദൃശ്യം സമൂഹമാധ്യമങ്ങളിലും പ്രചരിപ്പിച്ചു.