ചിങ്ങോലിയിൽ ജീവന് ഭീഷണിയായി ജലസംഭരണി

കുലുക്കമില്ലാതെ അധികൃതർ ആറാട്ടുപുഴ: ചിങ്ങോലി വായനശാല ജങ്ഷന്​ സമീപത്തെ പ്രവർത്തനം നിലച്ച കുടിവെള്ള സംഭരണി ജീവന് ഭീഷണിയാകുന്നു. വർഷങ്ങളായി ഇത്​ തിരിച്ചറിഞ്ഞിട്ടും ടാങ്ക് പൊളിച്ചുനീക്കാൻ കൂട്ടാക്കാതെ ജല അതോറിറ്റി അലംഭാവം കാട്ടുകയാണ്. ഐഡിയൽ-ചൂരവിള റോഡിനോടു ചേർന്നാണ് സംഭരണി. 80 വർഷത്തിന്​ മുമ്പാണിത്​ സ്ഥാപിച്ചത്. കാലപ്പഴക്കം കൊണ്ട്​ ബലക്ഷയം സംഭവിച്ചതിനാൽ 15 വർഷമായി ഉപയോഗിക്കുന്നില്ല. തൂണുകൾ ദുർബലമായതോടെ ടാങ്ക് ചരിഞ്ഞിട്ടുണ്ട്. ബാങ്കിന് സമീപത്തെ വീട്ടുകാർ ഭീതിയിലാണ് കഴിയുന്നത്. നിരവധി യാത്രക്കാരും വാഹനങ്ങളും വാട്ടർ ടാങ്കിന് സമീപത്തെ റോഡിൽ കൂടി ദിവസവും കടന്നു പോകുന്നുണ്ട്​. തൊട്ടടുത്ത സമാന്തര വിദ്യാഭ്യാസ സ്ഥാപനത്തിലെ കുട്ടികൾ സൈക്കിൾ പാർക്ക് ചെയ്യുന്നത് ടാങ്കിനു സമീപത്താണ്. ഏത് നിമിഷവും നിലംപൊത്താറായി നിൽക്കുന്ന കുടിവെള്ള സംഭരണി പൊളിച്ചുനീക്കണമെന്ന് പഞ്ചായത്തും നാട്ടുകാരും ബന്ധപ്പെട്ട അധികൃതരോട് ആവശ്യപ്പെട്ടിട്ടും നടപടിയുണ്ടാകുന്നില്ല.