വേനൽ കടുത്തു തീപിടിത്തം വ്യാപകം; ഓടിത്തളർന്ന്​ അഗ്​നിരക്ഷാസേന

-നഗരത്തിലും പരിസരത്തുമായി ഒരുമാസത്തിനിടെ ഇരുപത്തഞ്ചിലധികം തീപിടിത്തം ആലപ്പുഴ: വേനൽ കടുത്തതോടെ ആലപ്പുഴയിൽ തീപിടിത്തം വ്യാപകം. ജില്ലയിൽ ഈ മാസം വിവിധയിടങ്ങളിലായി അമ്പലധികം തീപിടിത്തം ഉണ്ടായി​. പകൽ കനത്ത ചൂടും കാറ്റുമാണ്​ തീപിടിത്തതിന്​ പ്രധാനകാരണം. ഉണങ്ങിയ ചപ്പുചവറുകൾക്കും പുല്ലിനുമാണ്​ പ്രധാനമായും തീപിടിക്കുന്നത്​. വൈദ്യുതി പോസ്റ്റുകൾക്കും നാശമുണ്ടായിട്ടുണ്ട്​. ഷോർട്ട്​ സർക്യൂട്ടാണ്​ വീടുകളിലെ തീപിടിത്തത്തിന്​ കാരണം. പറമ്പുകളിലും പാടത്തും ഉണങ്ങിയ പുല്ലിന്​ തീയിടുന്നതും വർധിച്ചു​. ആലപ്പുഴ നഗരത്തിലും പരിസരത്തുമായി ഇരുപത്തഞ്ചിലധികം സ്ഥലങ്ങളിലാണ്​ ജനുവരിയിൽ മാത്രം തീപിടുത്തമുണ്ടായത്​. പുതുവർഷത്തിന്‍റെ ആദ്യദിനം ബീച്ചിലെ വിജയപാർക്കിന്​ പടിഞ്ഞാറുവശത്തെ പുല്ലിനാണ്​ തീപിടിച്ചത്​. പിന്നീട്​ ബുദ്ധിമാൻ കോളനിയിൽ ട്രാൻസ്​​ഫോർമറിനും വൈദ്യുതി പോസ്​റ്റിനും തീപിടിച്ചു. കലവൂർ ആനകുത്തിപ്പാലത്തിന് സമീപം 50 സെന്‍റിൽ ഉണങ്ങിയ പുല്ലും കത്തിനശിച്ചു. ആലപ്പുഴ ചന്ദനക്കാവ് പാലസ് വാർഡിൽ പറമ്പിലെ പുല്ലിനും ആലപ്പുഴ സഹൃദയ ​ഹോസ്​പിറ്റലിന്​ സമീപത്തെ ജെറിസ്​ ബിൽഡിങ്ങിലെ വീട്ടിലെ മെയിൻ സ്വിച്ചും കത്തിനശിച്ചത്​ ഈ മാസമാണ്​. കോമളപുരം സ്പിന്നിങ്​ മില്ലിന് സമീപം പറമ്പിലെ പുല്ല്​, തുമ്പോളി എൻ.സി. ജോൺ കമ്പനി സ്ഥിതിചെയ്യുന്ന നാഷനൽ ഹൈവേക്ക് പടിഞ്ഞാറ്​ പുല്ലും ചപ്പുചവറുകളും തടികളും ചാനൽകേബിളിനും തീപിടിച്ച്​ നശിച്ചിരുന്നു. മാരാരിക്കുളം തെക്ക്​ പഞ്ചായത്ത്​ മൂന്നാംവാർഡിൽ ഗോപാലകൃഷ്​ണ കുറുപ്പിന്‍റെ പറമ്പിലെ പുല്ല്​​, ആലപ്പുഴ വഴിച്ചേരിയിൽ തടിമില്ലിനുസമീപം കൂട്ടിയിരുന്ന തടികൾ, ആലപ്പുഴ സൗത്ത് പൊലീസ് സ്​റ്റേഷന് സമീപം ചപ്പുചവർ, കളർകോട് കൈതവന ജങ്​ഷനുസമീപം ചവറുകൾ, കൂട്ടിയിട്ട മരക്കഷണങ്ങൾ, ഗവ. ഗെസ്റ്റ്​ ഹൗസിനു സമീപം പറമ്പിലെ പുല്ല്​, ആലപ്പുഴ കൊമ്മാടി ബൈപാസിന്​ സമീപം റോഡരികിലെ മരച്ചുവട്​, വഴിച്ചേരിയിൽ മുനിസിപ്പാലിറ്റിയുടെ പ്ലാസ്റ്റിക്​ മാലിന്യശേഖരണം, കളർകോട്​ റിലയൻസ് മാളിൽ പുറത്ത് കൂട്ടിയിരുന്ന മാലിന്യം, ആലപ്പുഴ ഇ.എം.എസ്​ സ്​റ്റേഡിയത്തിലെ മാലിന്യക്കൂമ്പാരം തുടങ്ങിയവക്ക്​ തീപിടിച്ചത്​ ഈ മാസമാണ്​. പലദിവസങ്ങളിലും തീപിടിത്തം കെടുത്തിയശേഷം അടുത്തസ്ഥല​ത്തേക്ക്​ കുതിച്ചെത്തേണ്ട സാഹചര്യമുണ്ടായിരുന്നു. തീപിടിക്കുന്ന വൈദ്യുതി പോസ്റ്റുകളുടെ എണ്ണവും കൂടുതലാണ്​. കഴിഞ്ഞദിവസത്തെ തീപിടിത്തത്തിന്​ പിന്നാലെ ഞായറാഴ്ച രണ്ടിടത്താണ്​ തീപിടിച്ചത്​. പുലർച്ച 12.05ന്​ ആലപ്പുഴ വൈ.എം.സി.എ സെന്‍റ്​ മേരീസ്​ തടിമില്ലിന്​ സമീപം തടികൾക്ക് തീപിടിച്ചതാണ്​ ആദ്യ സംഭവം. അഗ്​നിരക്ഷാസേനയുടെ നേതൃത്വത്തിൽ അരമണിക്കൂറോളം വെള്ളം പമ്പ്​ചെയ്താണ്​ തീ നിയന്ത്രണവിധേയമാക്കിയത്​. സമയോചിതമായ ഇടപെടലിൽ ലക്ഷങ്ങൾ വിലമതിക്കുന്ന തടികൾ സംരക്ഷിച്ചു. ഉച്ചക്ക്​ 12.25ന്​ ആലപ്പുഴ കെ.എസ്​.ആർ.ടി.സി കാന്‍റീനായി പ്രവർത്തിക്കുന്ന ഇന്ത്യൻ കോഫി ഹൗസിനും വാട്ടർ ട്രാൻസ്​പോർട്ട്​ ഡയറക്ടറേറ്റ്​ ഓഫിസിനും മധ്യേ ചപ്പുചവറുകൾക്ക്​​ തീപിടിച്ചതാണ്​ രണ്ടാമത്തേത്​​. തീ ആളിയതോടെ ചെറിയ സ്​ഫോടനശബ്ദം കേട്ടതും പരി​ഭ്രാന്തി പരത്തി. കാലപ്പഴക്കത്താൽ അപകടാവസ്ഥിലായ ഇരുനില കോഫിഹൗസ് കെട്ടിടത്തിന്‍റെ പി.വി.സി പൈപ്പുകളും കത്തിനശിച്ചു. മാലിന്യക്കൂമ്പാരത്തിൽ സ്​പ്രേബോട്ടിൽ പൊട്ടിത്തെറിച്ചതാണ്​​ സ്​ഫോടന ശബ്ദമുണ്ടാക്കിയതെന്നാണ്​ നിഗമനം. അസി. സ്​റ്റേഷൻ ഓഫിസർ എച്ച്​. സതീശൻ, ആർ. സന്തോഷ്, ബി. ബിനോയി, കെ.ആർ. അനീഷ്, വിപിൻ രാജ്, ടി.ടി. സന്തോഷ്, കെ.ബി. ഹാഷിം, ഷാജൻ കെ. ദാസ്, പി. അഖിലേഷ്, ഉദയകുമാർ എന്നിവർ രക്ഷാപ്രവർത്തനത്തിന്​ നേതൃത്വം നൽകി. APL fire alappuzha ആലപ്പുഴ ഇന്ത്യൻ കോഫി ഹൗസ്​ പ്രവർത്തിക്കുന്ന പഴയകെട്ടിടത്തിന്​ സമീപമുണ്ടായ തീപിടിത്തം അഗ്​നിരക്ഷാസേന കെടുത്തുന്നു