ബൈപാസിലെ അപകടങ്ങൾ: സുരക്ഷ നടപടി സ്വീകരിക്കണമെന്ന്​ ജി. സുധാകരൻ

ആലപ്പുഴ: ബൈപാസിൽ അപകടങ്ങൾ വർധിക്കുന്നത് ഗതാഗത വകുപ്പ് സുരക്ഷ നടപടി സ്വീകരിക്കാത്തതിനാലെന്ന് മുൻ പൊതുമരാമത്ത്​ മന്ത്രി ജി. സുധാകരൻ. കഴിഞ്ഞദിവസം ബൈപാസിൽ അപകടത്തിൽ അഞ്ചാം ക്ലാസ് വിദ്യാർഥിനി ദയ (11) മരിച്ചതടക്കം ചൂണ്ടിക്കാട്ടി അടിയന്തര സുരക്ഷ നടപടി എടുക്കണമെന്നാവശ്യപ്പെട്ട് സുധാകരൻ കലക്ടർ എ. അലക്സാണ്ടറിന് കത്തുനൽകി. ദയയുടെ വീട് സന്ദർശിച്ച സുധാകരന് പിതാവ് ജയ്​മോൻ നൽകിയ പരാതിയും സ്വന്തം കത്തിനൊപ്പം സുധാകരൻ കലക്​ട്രേറ്റിൽ എത്തി കൈമാറി. റോഡ് സുരക്ഷ അതോറിറ്റിയും ദേശീയപാത അതോറിറ്റിയും സുരക്ഷ നടപടികളിൽ വേണ്ടത്ര ശ്രദ്ധിച്ചില്ലെന്നാണ്​ കത്തിലെ വിമർശനം. ആർ.ടി.ഒയും മറ്റ്​ ഉദ്യോഗസ്ഥരുമായി സ്ഥലം സന്ദർശിച്ച ശേഷം അപകടങ്ങൾ ഒഴിവാക്കാൻ നടപടി സ്വീകരിക്കുമെന്ന് കലക്ടർ ഉറപ്പ് നൽകി. ഇരവുകാട്, കൊമ്മാടി, കളർകോട് ജങ്ഷൻ തുടങ്ങിയ മേഖലകളിൽ സന്ദർശനം നടത്തിയ കലക്ടർ ബൈപാസിലെ അപകടമേഖലകളിൽ സുരക്ഷക്കും മുന്നറിയിപ്പിനും അടിയന്തര ക്രമീകരണങ്ങൾ ഏർപ്പെടുത്താൻ പിന്നീട്​ നിർദേശം നൽകി. ദേശീയപാത വിഭാഗത്തിനാണ്​ നിർദേശം. ബൈപാസിൽ അതിവേഗത്തിലെത്തുന്ന വാഹനങ്ങളെ നിരീക്ഷിക്കാൻ​ കാമറകൾ സ്ഥാപിക്കുന്നത്​ പരിഗണനയിലുണ്ട്. ഇതിനുമുമ്പ്​ അപകടങ്ങൾ ഒഴിവാക്കുന്നതിന് അടിയന്തര നടപടികൾ സ്വീകരിക്കാനാണ്​ തീരുമാനം. മാളികമുക്ക്, ഇരവുകാട് എന്നിവിടങ്ങളിലെ വളവുകളുടെ സമീപത്ത് സ്പീഡ് ബ്രേക്കറുകൾ സജ്ജീകരിക്കും. ജങ്ഷനുകളിൽ സുഗമമായ ഗതാഗതത്തിന്​ തടസ്സമാകുന്ന ബസ് സ്റ്റോപ്പുകൾ മാറ്റിസ്ഥാപിക്കും. കൊമ്മാടിയിൽനിന്ന് ബൈപാസിലേക്ക്​ പ്രവേശിക്കുന്നിടത്ത് ഇടതുഭാഗത്തെ സർവിസ് റോഡ് ഉപയോഗക്ഷമമാക്കാനും കലക്ടർ നിർദേശിച്ചു.