കോവിഡ്​ പരിശോധന: വിലകുറഞ്ഞ സലൈവ കലക്ഷൻ കിറ്റ്​

ആലപ്പുഴ: കോവിഡ്​ പരിശോധനക്ക്​ നെക്സ്റ്റ്​ സലൈവ കലക്ഷൻ കിറ്റ്​ ആറുരൂപ നിരക്കിൽ നൽകുമെന്ന്​ ഒർജിൻ ഡയഗ്​നോസ്റ്റിക്സ് റിസർച്​ സി.ഇ.ഒ ഡോ. മനീഷ് മൈലാങ്കോട്ട് വാർത്തസമ്മേളനത്തിൽ അറിയിച്ചു. വേദനരഹിതവും 100ശതമാനം കൃത്യതയോടെ തയാറാക്കിയ കിറ്റ്​ വിദ്​ഗധരുടെ മേൽനോട്ടമില്ലാതെ സ്വയം ഉപയോഗിക്കാൻ കഴിയുന്ന രീതിയിലാണ്​ നിർമാണം. ഇന്ത്യൻ നിർമിതമായ നെക്സ്റ്റ് ഇൻവിട്രോ ഡയഗ്​നോസ്റ്റിക്സ് ഡിവൈസ്( ഐ.വി.ഡി) അംഗീകാരമുള്ള ആദ്യത്തെ ഉമിനീർ ശേഖരണ കിറ്റാണിത്​​. ബിലീവേഴ്സ് ചർച്ച് മെഡിക്കൽ കോളജിലും ഡി.സി.ജിയുടെയും സി.ഡി.സി.എസ്.ഒയുടെയും പരിശോധനയിലും അംഗീകാരം കിട്ടിയിട്ടുണ്ട്​. കൊല്ലം കരുനാഗപ്പള്ളിയിലെ ഒർജിൻ ഡയഗ്​നോസ്റ്റിക്സ് ആൻഡ് റിസർച്ചിലാണ്​ കിറ്റ്​ നിർമിച്ചത്​. മറ്റ്​ വൈറൽ ട്രാൻസ്​പോർട്ട് കിറ്റുകളെ അപേക്ഷിച്ച് 75 ശതമാനം കുറവ് പ്ലാസ്റ്റിക്കാണ്​ ഉ​പയോഗിച്ചിരിക്കുന്നതെന്നും അദ്ദേഹം പറഞ്ഞു.