ആലപ്പുഴയിൽ മൂന്നിടത്ത്​ തീപിടിത്തം

ആലപ്പുഴ: നഗരത്തിൽ മൂന്നിടത്ത്​ തീപിടിത്തം. രക്ഷാദൗത്യമൊരുക്കി അഗ്​നിരക്ഷാസേന. ഗവ. ഗെസ്റ്റ്​ ഹൗസിന്​ സമീപത്തെ പറമ്പിനും ബൈപാസിന്​ സമീപത്തെ മരത്തിനും നഗരസഭയുടെ മാലിന്യശേഖരത്തിനുമാണ്​ തീപിടിച്ചത്​. ഞായറാഴ്ച രാവിലെ 7.50ന്​ ആലപ്പുഴ കളപ്പുരയിൽ ഗവ. ഗെസ്റ്റ്​ ഹൗസിനുസമീപത്തെ പറമ്പിലെ പുല്ലിന്​ തീപിടിച്ചതായിരുന്നു ആദ്യസംഭവം. നിരവധി വീടുകൾ സ്ഥിതി ചെയ്യുന്ന പ്രദേശത്തേക്ക്​ തീ വ്യാപിച്ചതോടെ കേബിളുകളും കത്തിനശിച്ചു. അഗ്​നിരക്ഷാസേന എത്തിയാണ്​ തീ കെടുത്തിയത്​. തീപിടിത്തത്തിന്‍റെ കാരണം വ്യക്തമല്ല. പിന്നാലെ വൈകീട്ട്​ 3.18ന്​ ആലപ്പുഴ കൊമ്മാടി ബൈപാസിന്​ സമീപത്തെ മരത്തിന്​ തീപിടിച്ചു. മരച്ചുവട്ടിൽ ചപ്പുചവറുകൾ കൂട്ടിയിട്ട്​​ കത്തിച്ചതാണ്​ കാരണം. അഗ്​നിരക്ഷാസേനയെത്തി ഏറെ പരിശ്രമത്തിനൊടുവിലാണ്​ തീ കെടുത്തിയത്​. ഇതിനു​ശേഷമാണ്​ വഴിച്ചേരിയിൽ മുനിസിപ്പാലിറ്റിയുടെ പ്ലാസ്റ്റിക്​ മാലിന്യശേഖരത്തിന്​​ തീപിടിച്ചത്​. വൈകീട്ട്​ 3.55 നായിരുന്നു സംഭവം. വർഷങ്ങളോളം സംസ്കരിക്കാത്ത ഒരേക്കർ സ്ഥലത്ത്​ തീ പടരു​മെന്ന ആശങ്കയുണ്ടായിരുന്നു. സമീപത്ത്​ സപ്ലൈകോയുടെ പെട്രോൾ പമ്പും സ്ഥിതിചെയ്യുന്നത്​ പരിഭ്രാന്തി പരത്തി. അഗ്​നിരക്ഷാസേനയുടെ രണ്ട്​ യൂനിറ്റ്​ എത്തിയാണ്​ തീകെടുത്തിയത്​. അസി. സ്​റ്റേഷൻ ഓഫിസർ ടി. സാബു, എൻ.ആർ. ഷൈജു, കെ.ബി. ഹാഷിം, ജോബിൻ വർഗീസ്, പ്രശാന്ത്, സന്തോഷ്, അനീഷ് ചന്ദ്രൻ, ടി.കെ. കണ്ണൻ, ഷൈൻ കുമാർ, ബൈജു, എസ്​. കണ്ണൻ, ബി. ബിനോയ്​, അമൽദേവ്​, ടി. ഉദയകുമാർ എന്നിവർ രക്ഷാപ്രവർത്തനത്തിന്​ നേതൃത്വം നൽകി. APL gust house fire ആലപ്പുഴ കളപ്പുരയിൽ ഗവ. ഗെസ്റ്റ്​ ഹൗസിന്​ സമീപത്തെ പറമ്പിലെ തീകെടുത്തുന്ന അഗ്​നിരക്ഷാസേന APL municiplaity plastic ആലപ്പുഴ വഴിച്ചേരിയിൽ മുനിസിപ്പാലിറ്റിയുടെ പ്ലാസ്റ്റിക്​ മാലിന്യശേഖരത്തിലെ തീ അഗ്​നിരക്ഷാസേന അണക്കുന്നു