'എലിവേറ്റഡ് ബീച്ച് ഹൈവേ: ഫലപ്രദമായ വാഹന നിയന്ത്രണ സംവിധാനം വേണം'

ആലപ്പുഴ: നിരന്തരം അപകടങ്ങളുണ്ടാകുന്ന ആലപ്പുഴ ബൈപാസ് എലിവേറ്റഡ് ബീച്ച് ഹൈവേയില്‍ ഫലപ്രദമായ വാഹന നിയന്ത്രണസംവിധാനങ്ങള്‍ ഒരുക്കൽ അനിവാര്യമെന്ന്​ പഠനം. ഡ്രൈവര്‍മാരുടെ അവിവേകവും അഹന്തയും അശ്രദ്ധയുമാണ് മുഖ്യമായും തടയേണ്ടത്. ഇങ്ങനെയുള്ളവരാണ്​ നിരപരാധികളുടെ ജീവൻ പൊലിയാനും പരിക്കേൽക്കാൻ കാരണമാകുന്ന​തെന്നും​ തത്തംപള്ളി റെസിഡന്റ്‌സ് അസോസിയേഷന്‍ (ടി.ആർ.എ) നടത്തിയ പഠനത്തിൽ പറയുന്നു. ഏഴു കി.മീ. ദൂരമുള്ള എലിവേറ്റഡ് ഹൈവേയിൽ രാത്രികാലത്ത് സഹായസംവിധാനങ്ങള്‍ ഒന്നുംതന്നെയില്ല. അപകടങ്ങളുണ്ടാകുമ്പോള്‍ മണിക്കൂറുകളോളമാണ് ഗതാഗതം തടസ്സപ്പെടുന്നത്. പാലങ്ങള്‍ പോലുള്ളയിടങ്ങളില്‍ ഓവര്‍ടേക്കിങ്​ പാടില്ലെങ്കിലും ബഹുഭൂരിപക്ഷവും ഇത് അനുസരിക്കാറില്ല. വേഗ നിയന്ത്രണമുള്ളയിടത്തും ഇരുചക്രവാഹനങ്ങള്‍ അടക്കം ചീറിപ്പായുകയാണ്​. ദീര്‍ഘവീക്ഷണമില്ലാത്ത നിര്‍മിതിയും നിര്‍മാണ അപാകതകളുമാണ് പ്രശ്‌നം ഗുരുതരമാവാനും അപകടങ്ങള്‍ അടിക്കടിയുണ്ടാകാനും കാരണമാകുന്നതെന്ന്​ ടി.ആർ.എ വിലയിരുത്തി. നാലു പതിറ്റാണ്ടെടുത്ത് അശാസ്ത്രീയ രീതിയില്‍ നിര്‍മിച്ച ഇടുങ്ങിയ രണ്ടുവരി എലിവേറ്റഡ് ഹൈവേയിലെ നിരന്തര അപകടങ്ങള്‍ ഒഴിവാക്കാന്‍ ജനപ്രതിനിധികള്‍ അടക്കമുള്ളവര്‍ രംഗത്ത്​ വരണമെന്ന്​ ടി.ആർ.എ ആവശ്യപ്പെട്ടു.