വരൾച്ച അരികെ അണക്കെട്ടുകൾ തുറന്നു; വെള്ളം ഒഴുകാതെ കനാലുകൾ

ചാരുംമൂട്​: ജില്ലയുടെ കിഴക്കൻ മേഖലയിൽ വരൾച്ചയുടെ ലക്ഷണങ്ങൾ കണ്ടുതുടങ്ങിയതോടെ ഡാം തുറക്കുന്നതിന്​ അധികൃതർ തുടക്കമിട്ടെങ്കിലും കനാലുകൾ വൃത്തിയാക്കാത്തത്​ തിരിച്ചടിയാകുന്നു. പലയിടത്തും കനാലുകൾ ജലം സുഗമമായി ഒഴുകാൻ പാകത്തിനല്ല. ചിലയിടങ്ങളിൽ അറ്റകുറ്റപ്പണി തുടങ്ങിയിട്ടുണ്ടെങ്കിലും തീർന്നിട്ടില്ല. മാലിന്യം നീക്കാനുമുണ്ട്​. ചിലയിടത്ത്​ മണ്ണിടിഞ്ഞും കാടുകയറിയും കിടക്കുകയാണ്​. അതേസമയം, തെന്മല ഡാം തിങ്കളാഴ്ച തുറന്നു. പമ്പ ജലസേചന പദ്ധതിയിൽനിന്നുള്ള ജലം ചെറിയനാട് പടനിലത്ത്​ തുടങ്ങി ചെന്നിത്തല ആറാം ബ്ലോക്ക് പാടശേഖരം വരെയാണ്​ കനാൽ. കുട്ടംപേരൂർ ഭാഗത്ത് മാലിന്യം കെട്ടിക്കിടക്കുന്നതിനാൽ നീരൊഴുക്കിന് തടസ്സമുണ്ട്​. ബുധനൂർ, ചെന്നിത്തല, മാന്നാർ പഞ്ചായത്തുകളിൽ പമ്പ ജലസേചന പദ്ധതിയുടെ ചെന്നിത്തല ഇടതുകര കനാലിലൂടെയാണ് വെള്ളമെത്തുന്നത്. ചെറിയനാട്ടുനിന്ന്​ തുടങ്ങുന്ന ചെന്നിത്തല ഇടതുകര ഉപകനാലാണ് പുലിയൂർ ഇലഞ്ഞിമേൽ, ബുധനൂർ, മാന്നാർ, ചെന്നിത്തല പഞ്ചായത്തുകളിൽ വെള്ളമെത്തിക്കുന്നത്. മുന്നറിയിപ്പോ തയാറെടുപ്പുകളോ ഇല്ലാതെയാണ് ഡാം തുറന്നതെന്നു പരാതിയുണ്ട്. നാളുകളായി ഉപയോഗശൂന്യമായി കിടന്നതിനാൽ കുട്ടംപേരൂർ ഭാഗത്തു മാലിന്യം അടിഞ്ഞ്​ നീരൊഴുക്ക് തടസ്സപ്പെട്ടു. നീരൊഴുക്ക് തടസ്സപ്പെട്ടതിനാൽ മാന്നാറിലെയും ചെന്നിത്തലയിലെയും കൃഷിയിടങ്ങളിലേക്ക് വെള്ളമെത്തുന്നില്ല. കനാലിൽനിന്ന് ഇഴജന്തുക്കൾ സമീപവീടുകളിൽ കയറുന്നതായി പരാതിയുണ്ട്​. പലയിടത്തും ചോർച്ചയുമുണ്ട്. ഇടതുകര കനാൽ അവസാനിക്കുന്ന ചെന്നിത്തലയിൽ വെള്ളമെത്തിയിട്ടില്ല. ചെങ്ങന്നൂർ മേഖലയിൽ പി.ഐ.പി ഇടതുകര കനാലിൽ വെള്ളമെത്തിയെങ്കിലും വലതുകര കനാലിൽ എത്തുന്നേയുള്ളു. കോഴഞ്ചേരി കാഞ്ഞേറ്റുംകരയിൽ കനാലിൽ വീണുകിടക്കുന്ന മരവും മാലിന്യവും നീക്കിയാലേ വെള്ളമൊഴുകൂ. കല്ലട തുറക്കുന്നതോടെ ​പുനലൂരിൽനിന്ന് അടൂരിലെത്തുന്ന വെള്ളം മെയിൻ കനാലിലൂടെ ചാരുംമൂട്ടിലേക്കാണ്​ വരുക. അവിടെനിന്ന് വള്ളികുന്നം, നൂറനാട്ടുനിന്ന് പറയംകുളത്ത് എത്തിയ ശേഷം ചെറിയ കനാലുകളിലൂടെ തെക്കേക്കര പഞ്ചായത്തിലേക്കും മറ്റിടങ്ങളിലേക്കും എത്തും. എന്നാൽ, ചാരുംമൂട് മേഖലയിലെ കനാലുകളിൽ അറ്റകുറ്റപ്പണി പൂർത്തിയായിട്ടുണ്ട്​. ചിത്രം: APL KANAL 1 കാടുമൂടിയ നിലയിൽ നൂറനാട്​ ഭാഗത്തെ​ കെ.ഐ.പി കനാൽ APL KANAL 2 ആദിക്കാട്ടുകുളങ്ങരയിലെ കനാൽ