കളഞ്ഞുകിട്ടിയ സ്വർണമാല ഉടമയെ കണ്ടെത്തി നൽകി വിദ്യാർഥിനികൾ

മണ്ണഞ്ചേരി: കളഞ്ഞുകിട്ടിയ സ്വർണ മാല ഉടമയെ കണ്ടെത്തി നൽകി നഴ്സിങ്​ വിദ്യാർഥിനികൾ. ആലപ്പുഴ ജനറൽ ആശുപത്രിയിലെ നഴ്സിങ്​ വിദ്യാർഥിനികളായ മണ്ണഞ്ചേരി ഏഴാം വാർഡ് ചേലക്കാപള്ളിയിൽ ഹരികുമാറിന്‍റെ മകൾ ഐശ്വര്യ, പുത്തൻപുരക്കൽ ശിവപ്രസാദിന്‍റെ മകൾ ശിവരഞ്ജിനി എന്നിവരാണ് മാതൃകയായത്. കോളജിൽനിന്ന്​ വീട്ടിലേക്കുള്ള യാത്രയിൽ അമ്പനാകുളങ്ങരയിലെ റോഡരികിൽനിന്നാണ്​ രണ്ട് പവന്‍റെ മാല കിട്ടിയത്. തുടർന്ന് ഐശ്വര്യയുടെ സഹോദരൻ അഖിലിനെ വീട്ടിൽനിന്ന്​ വിളിച്ചുവരുത്തി മണ്ണഞ്ചേരി പൊലീസിന് മാല കൈമാറി. മണ്ണഞ്ചേരി കെ.എം സൗണ്ട് ഉടമ കണ്ടത്തിൽ കെ.എം. മുസ്തഫയുടെ ഭാര്യ മണ്ണഞ്ചേരി സപ്ലൈകോ സൂപ്പർമാർക്കറ്റിലെ ജീവനക്കാരി റസീനയുടെ മാലയാണ് ശനിയാഴ്ച വീട്ടിൽനിന്ന്​ മണ്ണഞ്ചേരി പ്രാഥമിക ആരോഗ്യകേന്ദ്രത്തിലേക്കുള്ള യാത്രയിൽ നഷ്ടപ്പെട്ടത്. യാത്ര ചെയ്ത വഴികളിലൊക്കെ പരതിയെങ്കിലും കണ്ടെത്താനാകാതെ വിഷമിച്ചുനിൽക്കുന്ന സമയത്താണ് പൊലീസ് സ്റ്റേഷനിൽ സ്വർണമാല കളഞ്ഞുകിട്ടിയ വിവരം അറിഞ്ഞ്​ ബന്ധപ്പെട്ടത്​. സി.ഐ പി.കെ. മോഹിത്തിന്‍റെയും സബ്​ ഇൻസ്പെക്ടർ കെ.ആർ. ബിജുവിന്‍റെയും സാന്നിധ്യത്തിൽ സ്റ്റേഷനിൽവെച്ച് വിദ്യാർഥിനികൾ റസീനക്ക് മാല കൈമാറി. പടം : റോഡരികിൽനിന്ന്​ ലഭിച്ച സ്വർണമാല നഴ്സിങ്​ വിദ്യാർഥിനികളായ ഐശ്വര്യയും ശിവരഞ്ജിനിയും ചേർന്ന് ഉടമക്ക് കൈമാറുന്നു