എഴുന്നള്ളിപ്പിനിടെ ആനയുടെ കണ്ണിൽ ലേസർ രശ്മി; അ​ന്വേഷണം തുടങ്ങി

ചെങ്ങന്നൂർ: തൃച്ചെങ്ങന്നൂർ ദേവിയുടെ തൃപ്പൂത്ത് ആറാട്ട് എഴുന്നള്ളിപ്പിനിടെ ആനയുടെ കണ്ണിൽ ലേസർ രശ്മി പതിച്ചു. പമ്പാനദിയിലെ മിത്രപ്പുഴ ആറാട്ട് കഴിഞ്ഞ് ക്ഷേത്രത്തിലേക്ക് പ്രവേശിക്കുന്നതിന് മുമ്പ്​ കിഴക്കേ ഗോപുരവാതിലിന് സമീപത്തെത്തിയപ്പോഴാണ് ദേവിയുടെ തിടമ്പേറ്റിയ ഗജവീരൻ ഓമല്ലൂർ മണികണ്ഠന്‍റെ മുഖത്തും കണ്ണിലും ലേസർ രശ്മി പതിഞ്ഞത്. ഈ സമയം ആന തല ഉയർത്തി അസ്വസ്ഥത കാട്ടുന്നത്​ വിഡിയോ ദൃശ്യങ്ങളിൽ വ്യക്തമാണ്. ഒപ്പമുണ്ടായിരുന്ന ഭക്തർ, ദേവസ്വം അധികൃതർ, മേളക്കാർ, ഉപദേശകസമിതി ഭാരവാഹികൾ തുടങ്ങിയവർ എന്താണെന്നറിയാതെ ഈ സമയം ആശങ്കയിലായി. തുടർന്ന് പാപ്പാൻ ആനയെ അനുനയിപ്പിക്കുകയായിരുന്നു. പിന്നീട് വിഡിയോ ദൃശ്യങ്ങൾ സമൂഹ മാധ്യമങ്ങളിൽ വ്യാപകമായതോടെയാണ് അധികൃതർ വിവരം അറിഞ്ഞത്. ചില സാമൂഹികവിരുദ്ധർ ഉത്സവം അലങ്കോലപ്പെടുത്താൻ നടത്തിയ ശ്രമത്തിന്‍റെ ഭാഗമാണിതെന്ന് ഉപദേശക സമിതി ആരോപിച്ചു. ഇതുസംബന്ധിച്ച് ചെങ്ങന്നൂർ ഡിവൈ.എസ്.പിക്കും അസിസ്റ്റന്‍റ്​ ഫോറസ്റ്റ് കൺസർവേറ്റർക്കും പരാതി നൽകിയതായി ഉപദേശകസമിതി പറഞ്ഞു. സംഭവത്തിൽ ഉദ്യോഗസ്ഥർ അന്വേഷണം ആരംഭിച്ചു.