പക്ഷി-മൃഗാദികളെ അന്നമൂട്ടി പ്രസന്ന​െൻറ ദിനചര്യ

പക്ഷി-മൃഗാദികളെ അന്നമൂട്ടി പ്രസന്ന​ൻെറ ദിനചര്യ ചെങ്ങന്നൂർ: വർഷങ്ങളായി തെരുവിൽ കഴിയുന്ന നായ്ക്കളെയും മറ്റും അന്നമൂട്ടി വ്യാപാരി പ്രസന്നൻ. മാന്നാർ കുറ്റിയിൽമുക്കിലെ രേഷ്മ ഫാൻസി സൻെറർ ഉടമ കുരട്ടിശ്ശേരി പെരുവുംകുളത്ത്​ വീട്ടിൽ പ്രസന്നനാണ്​ ഇവയെ സംരക്ഷിക്കുന്നതിൽ സംതൃപ്തി കണ്ടെത്തുന്നത്​. നായ്​ക്കൾ, പൂച്ചകൾ, പറവകൾ എന്നിവക്ക് ദിനേന മൂന്നുനേരവും ആഹാരം നൽകും. മാവേലിക്കര-തിരുവല്ല സംസ്ഥാനപാതയിലാണ്​ പ്രസന്ന​ൻെറ കട. ആഹാരസമയമാകുമ്പോൾ ഇവ കടക്ക്​ മുന്നിലെത്തും. പതിനഞ്ചോളം നായ്ക്കളെത്താറുണ്ട്. ചില സമയങ്ങളിൽ പ്രാവുകളും പൂച്ചകളും വരും. ഇവർക്ക് ഭക്ഷണം നൽകിയശേഷമേ രാവിലെ വീട്ടിൽനിന്ന്​ കൊണ്ടുവരുന്ന ഭക്ഷണം പ്രസന്നൻ കഴിക്കുകയുള്ളൂ. കട തുറക്കാൻ വൈകിയാൽ നായ്​ക്കൾ കൂട്ടമായി കടത്തിണ്ണയിൽ കാത്തിരിക്കും. രാത്രിയിൽ കടക്ക് കാവലായും ഇവകൾ ഉണ്ടാവും. ലോക്ഡൗൺ സമയത്ത് കട തുറക്കാതിരുന്നപ്പോഴും ഇവക്ക്​ മുടക്കംവരുത്താതെ ഭക്ഷണവുമായി എത്തുമായിരുന്നു ഈ 60കാരൻ.