ഇസ്​ലാമിനെ മോശപ്പെടുത്താൻ ശ്രമങ്ങൾ നടക്കുന്നു -അലിയാർ അൽ ഖാസിമി

അമ്പലപ്പുഴ: ഇസ്​ലാമിനെ മോശപ്പെടുത്താനുള്ള ശ്രമങ്ങൾ വിവിധ കോണുകളിൽനിന്ന്​ അനുദിനം ഉണ്ടാകുന്നതായി ജംഇയ്യതുൽ ഉലമായെ ഹിന്ദ് സംസ്ഥാന ജനറൽ സെക്രട്ടറി വി.എച്ച്. അലിയാർ അൽ ഖാസിമി. 'ഇസ്​ലാം ആശയസംവാദത്തിന് സൗഹൃദ നാളുകൾ' ജമാഅത്തെ ഇസ്​ലാമി കാമ്പയി​ൻെറ ഭാഗമായി അമ്പലപ്പുഴ ഏരിയ സമിതിയുടെ ആഭിമുഖ്യത്തിൽ വളഞ്ഞവഴി ജങ്​ഷനിൽ നടത്തിയ ബഹുജനസംഗമത്തിൽ മുഖ്യപ്രഭാഷണം നടത്തുകയായിരുന്നു അദ്ദേഹം. ഇന്ത്യയിലെ മുസ്​ലിംകൾ ഭീകരരാണെന്ന് വരുത്തിത്തീർക്കാൻ ചില സംഘടനകളെ കരുവാക്കുകയാണ്. മുസ്​ലിംകൾ രാജ്യത്തിന് ഭീഷണിയാണെന്ന് ഭരണകൂടം തങ്ങളുടെ മെഷിനറിയെ ഉപയോഗിച്ച് പ്രചരിപ്പിക്കുന്നത് ഇന്ത്യയിൽ ആദ്യമാണ്. സംഘ്​പരിവാർ നടത്തുന്ന വ്യാജപ്രചാരണങ്ങൾക്ക് നേരേ ഭരണകൂടം അവലംബിക്കുന്ന മൗനം ജനങ്ങൾക്കിടയിൽ വലിയ ഛിദ്രതക്ക് കാരണമാകുന്നുണ്ടെന്നും അദ്ദേഹം അഭിപ്രായപ്പെട്ടു​. ജമാഅത്തെ ഇസ്​ലാമി ജില്ല പ്രസിഡൻറ് ഹക്കീം പാണാവള്ളി അധ്യക്ഷത വഹിച്ചു. സംസ്ഥാന സെക്രട്ടറി അബ്​ദുൽ ഹക്കീം നദ്‌വി ഉദ്ഘാടനം ചെയ്തു. ജില്ല ജനറൽ സെക്രട്ടറി നവാസ് ജമാൽ, കെ.എൻ.എം ജില്ല സെക്രട്ടറി ഒ.എം. ഖാൻ തുടങ്ങിയവർ സംസാരിച്ചു. കെ.എം. യാസർ സ്വാഗതവും സിറാജ് കരൂർ നന്ദിയും പറഞ്ഞു. യൂനുസ് അമ്പലപ്പുഴ ഖിറാഅത്ത് നടത്തി. ജമാഅത്തെ ഇസ്​ലാമി അമ്പലപ്പുഴ ഏരിയ സമിതി നടത്തിയ ബഹുജനസംഗമത്തിൽ വി.എച്ച്. അലിയാർ അൽ ഖാസിമി മുഖ്യപ്രഭാഷണം നടത്തുന്നു