മൂന്ന്​ പെൺകുട്ടികളുടെ ജീവൻ രക്ഷിക്കാൻ മാന്നാർ ഒന്നിക്കുന്നു

മാന്നാർ: മൂന്നു പെൺകുട്ടികളുടെ ജീവൻ രക്ഷിക്കേണ്ട ദൗത്യമേറ്റെടുത്ത് മാന്നാർ ഗ്രാമപഞ്ചായത്ത്. ഇതിനായി 12ന്​ 18വാർഡുകളിലും ജനപ്രതിനിധികളടക്കമുള്ള എല്ലാ വിഭാഗം ആളുകളുടെയും നേതൃത്വത്തിൽ ഭവനസന്ദർശനം നടത്തി ധനസമാഹരണം നടത്താൻ സർവകക്ഷി യോഗം തീരുമാനിച്ചു. കുട്ടമ്പേരൂർ അലിൻഡ് സ്വിച്ച് ഗിയർ ഡി വിഷൻ ഫാക്ടറി മുട്ടേൽ ഒമ്പതാംവാർഡിൽ കരിയിൽ കിഴക്കേതിൽ വീട്ടിൽ ഗോപിക്കുട്ടൻ-സരസ്വതി ദമ്പതികളുടെ മക്കളായ അഞ്ജന ഗോപി (18), ജി. ആർദ്ര(13), ഹോമിയോ ആശുപത്രി 16ാം വാർഡിൽ കുട്ടമ്പേരൂർ കുന്നുതറയിൽ വീട്ടിൽ രതീഷ്-വിദ്യ ദമ്പതികളുടെ മകൾ നിഹ (ഒമ്പത്​) എന്നിവരുടെ മജ്ജമാറ്റിവെക്കൽ ശസ്ത്രക്രിയക്കായി 90 ലക്ഷം കണ്ടെത്താനുള്ള ദൗത്യവുമായാണ് ജന മധ്യത്തിലേക്കിറങ്ങുന്നത്. കൂലിപ്പണിക്കാരനായ ഗോപിക്കുട്ട​ൻെറ മക്കളായ അഞ്​ജന പ്ലസ് ടു വരെ പഠിച്ചിട്ടുണ്ട്. നാലുവർഷം മുമ്പാണ്​ രോഗം കണ്ടെത്തിയത്. ആർദ്ര ഒമ്പതാംക്ലാസ്​ വിദ്യാർഥിനിയാണ്​. രണ്ടുവർഷം മുമ്പാണ്​ രോഗം സ്ഥിരീകരിച്ചത്. ഇരുവരുടെയും ചികിത്സ തിരുവല്ലയിലെ സ്വകാര്യ ആശുപത്രിയിലാണ്​ നടത്തുന്നത്​. മൂന്നാംക്ലാസ്​ വിദ്യാർഥിനി രതീഷി​ൻെറ മകൾ നിഹക്ക് രണ്ടുവർഷം മുമ്പാണ്​ രോഗം കണ്ടെത്തിയത്​. പെട്ടി ഓട്ടോ ഡ്രൈവറായിരുന്ന രതീഷിനു മകളെ ചികിത്സക്കായി കൊണ്ടുപോകുന്നതിനായി ജോലിക്ക്​ പോകുന്നതിനു കഴിയാത്ത സാഹചര്യമാണുള്ളത്. ഗ്രാമപഞ്ചായത്ത് പ്രസിഡൻറ്​ ടി.വി. രത്നകുമാരി അധ്യക്ഷതവഹിച്ചു. വൈസ് പ്രസിഡൻറ്​ സുനിൽ ശ്രദ്ധേയം, ആരോഗ്യ വിദ്യാഭ്യാസ - സ്ഥിരം സമിതി ചെയർപേഴ്സൻ വത്സല ബാലകൃഷ്ണൻ, മാവേലിക്കര ബ്ലോക്ക് ക്ഷേമകാര്യ സ്ഥിരം സമിതി ചെയർമാൻ ബി.കെ. പ്രസാദ്, ഗ്രാമപഞ്ചായത്ത് സ്ഥിരം സമിതി ചെയർമാൻമാരായ ശാലിനി രഘുനാഥ്, സലിം പടിപ്പുരയ്ക്കൽ, മെംബർമാരായ വി.ആർ . ശിവപ്രസാദ്, മധു പുഴയോരം, സുനിത എബ്രാഹം, സലീന നൗഷാദ, രാധാമണി ശശീന്ദ്രൻ, അജിത് പഴവൂർ, എസ്. ശാന്തിനി, കെ.സി പുഷ്പലത വിവിധ രാഷ്​ട്രീയ പാർട്ടി നേതാക്കളായ ശിവകുമാർ, മുഹമ്മദ് ഷാനി, മാന്നാർ അഭിഷാല്, സി.ഡി.എസ് ചെയർപേഴ്സൻ സുശീല സോമരാജൻ എന്നിവർ സംസാരിച്ചു.