എക്​സൽ ഗ്ലാസസ്​: എ.ഐ.ടി.യു.സി തുടർപ്രക്ഷോഭം നാളെ

ആലപ്പുഴ: പാതിരപ്പള്ളി എക്‌സൽ ഗ്ലാസസ് സർക്കാർ ഏറ്റെടുക്കണമെന്ന് ആവശ്യപ്പെട്ട് എ.ഐ.ടി.യു.സി തുടർപ്രക്ഷോഭത്തി​ൻെറ ഭാഗമായി വ്യാഴാഴ്​ച വൈകീട്ട്​ നാലിന്​ കമ്പനി പടിക്കൽ പ്രതിഷേധ ജ്വാലയും സമ്മേളനവും നടത്തുമെന്ന്​ നേതാക്കൾ വാർത്തസമ്മേളനത്തിൽ പറഞ്ഞു. എ.ഐ.ടി.യു.സി സംസ്ഥാന വൈസ് പ്രസിഡൻറ്​ ടി.ജെ. ആഞ്ചലോസ് ഉദ്‌ഘാടനം ചെയ്യും. ദേശീയ സമിതി അംഗം പി.വി. സത്യനേശൻ പ്രതിഷേധ ജ്വാല തെളിക്കും. 600ലേറെ തൊഴിലാളികൾ പ്രത്യക്ഷമായും ആയിരത്തിലധികം പേർ പരോക്ഷമായും തൊഴിൽ ചെയ്‌തിരുന്ന സ്ഥാപനം 2012ലാണ്​ അടച്ചുപൂട്ടിയത്​. സ്ഥാപനം സർക്കാർ ഏറ്റെടുത്ത് തൊഴിലാളികളെ സംരക്ഷിക്കണമെന്നതാണ് എൽ.ഡി.എഫി​ൻെറ പ്രഖ്യാപിത നിലപാട്. ഈ ആവശ്യമാണ് എ.ഐ.ടി.യു.സിയും മുന്നോട്ടുവെക്കുന്നത്​. കേരളത്തി​ൻെറ വ്യവസായ ചരിത്രം പരിശോധിച്ചാൽ ഇത്തരത്തിൽ പൂട്ടപ്പെട്ട നിരവധി വ്യവസായ സ്ഥാപനങ്ങൾ സർക്കാർ ഏറ്റെടുത്ത ചരിത്രം ഉണ്ടെന്നിരിക്കെ സർക്കാർ കാട്ടുന്ന മൗനം പ്രതിഷേധാർഹമാണെന്ന്​ നേതാക്കൾ കുറ്റപ്പെടുത്തി. വാർത്തസമ്മേളത്തിൽ എക്സൽ ഗ്ലാസസ് എംപ്ലോയീസ് യൂനിയൻ (എ.ഐ.ടി.യു.സി ) സെക്രട്ടറി ആർ. അനിൽകുമാർ, ജില്ല അസി. സെക്രട്ടറി ഡി.പി. മധു, സമര സംഘടക സമിതി ചെയർമാൻ പി.യു. അബ്​ദുൽ കലാം, കൺവീനർ ആർ. ശശിയപ്പൻ എന്നിവർ പങ്കെടുത്തു.