ദുരിതത്തിന് മോക്ഷം: മുതുകുളം ഉമ്മർമുക്ക്-കണ്ണാട്ട്മുക്ക് റോഡ് പണി പൂർത്തിയായി

ആറാട്ടുപുഴ: പ്രതിപക്ഷ നേതാവ് രമേശ് ചെന്നിത്തലയുടെ 2015-16 വർഷത്തെ എം.എൽ.എ ആസ്തി വികസന ഫണ്ടിൽനിന്നും ഒരു കോടി രൂപ അനുവദിച്ച മുതുകുളം ഉമ്മർമുക്ക് കണ്ണാട്ട്-സംഗമം റോഡ് ദീർഘനാളത്തെ കാത്തിരിപ്പിനും ദുരിതങ്ങൾക്കും ഒടുവിൽ പണി പൂർത്തിയായി. റോഡ് പൂർണമായും തകർന്നതിനെ തുടർന്ന് പ്രദേശവാസികളും മുതുകുളം കോൺഗ്രസ് മണ്ഡലം കമ്മിറ്റിയും രമേശ് ചെന്നിത്തലക്ക്​ നിവേദനം നൽകുകയായിരുന്നു. തുടർന്ന്​ ഒരു കോടി എം.എൽ.എ അനുവദിച്ച​ു. നടപടിക്രമങ്ങൾ പൂർത്തിയാക്കാൻ ഏറെനാൾ എടുത്തു. തുടർന്ന് കരാർ നൽകിയെങ്കിലും കരാറുകാരൻ പണികൾ തുടങ്ങാതെ നീട്ടിക്കൊണ്ട്​ പോവുകയായിരുന്നു. ഇതിൽ പ്രതിഷേധിച്ച് കായംകുളം പി.ഡബ്ല്യു അസിസ്​റ്റൻറ്​ എൻജിനീയർ ഓഫിസിൽ കോൺഗ്രസ് പ്രവർത്തകരും ജനപ്രതിനിധികളും സമരം നടത്തി. പ്രശ്​നത്തിൽ പ്രതിപക്ഷനേതാവ് ഇടപെടുകയും ഒരു മാസത്തിനുള്ളിൽ പണി പൂർത്തീകരിച്ചില്ലെങ്കിൽ ശക്തമായ നടപടികൾ കൈക്കൊള്ളുമെന്ന താക്കീത്​ നൽകുകയും ചെയ്​തതിനെ തുടർന്നാണ് റോഡിന് ശാപമോക്ഷമായത്.