ലോഡ്​ജിൽ​ തീപിടിത്തം; കടമുറികൾ കത്തിനശിച്ചു

-ലക്ഷങ്ങളുടെ നഷ്ടം ചേര്‍ത്തല: കൊറിയർ സർവിസ് പ്രവർത്തിച്ചിരുന്ന ലോഡ്ജിന് തീപിടിച്ച്​ ലക്ഷങ്ങളുടെ നഷ്ടം; ആളപായമില്ല. ഗേള്‍സ് സ്‌കൂള്‍ കവലക്കു സമീപത്തെ കെട്ടിടത്തിനാണ്​ തീപിടിച്ചത്​. നാലുകടമുറി പൂര്‍ണമായും രണ്ടെണ്ണം ഭാഗികമായും കത്തിനശിച്ചു. ശനിയാഴ്ച രാവിലെ 10.30നാണ്​ സംഭവം. താമസക്കാരടക്കം മുറികളില്‍ ഉണ്ടായിരുന്നെങ്കിലും എല്ലാവരെയും ഒഴിപ്പിച്ച് തീയണക്കാനായി. നഗരസഭ 10ാം വാര്‍ഡ് മുല്ലപ്പള്ളി തോമസിന്‍റെ വിമല ലോഡ്ജിനാണ് തീപിടിച്ചത്. കാലപ്പഴക്കമുള്ള ഓടിട്ട കെട്ടിടത്തിലെ ബ്ലോക്കില്‍ എട്ടോളം കടമുറികളും അത്രതന്നെ ലോഡ്​ജ്​ മുറികളുമാണ്​ ഉണ്ടായിരുന്നത്. രാവിലെ 10.30ന്​ അരൂര്‍ സ്വദേശി ജഗദീഷ് നടത്തുന്ന സ്പീഡ് ആന്‍ഡ് സേഫ് കൊറിയര്‍ സർവിസ് സ്ഥാപനത്തിലാണ് ആദ്യം തീപടര്‍ന്നത്. സ്ഥാപനത്തിലെ സാമഗ്രികള്‍ ഏതാണ്ട്​ പൂര്‍ണമായും കത്തിനശിച്ചു. നഷ്ടം കണക്കാക്കിയിട്ടില്ല. തൊഴിലാളികളടക്കം താമസിക്കുന്ന ഭാഗത്തേക്ക്​ തീപടരുന്നതിനു മുന്നേ അണക്കാനായി. കൊറിയർ സർവിസ്​ നടത്തിയ മൂന്നുകടമുറിയും മറ്റ്​ സ്ഥാപനങ്ങൾ പ്രവർത്തിക്കുന്ന കടമുറികളുമാണ്​ കത്തിനശിച്ചത്​. വൈദ്യുതി ലൈനിലെ തകരാറാണ് തീപിടിത്തത്തിന്​ കാരണമെന്നാണ് പ്രാഥമിക നിഗമനം. ചേര്‍ത്തലയിലെ മൂന്നു യൂനിറ്റ് അഗ്‌നിരക്ഷാസേനയെത്തി ഒന്നരമണിക്കൂറുകൊണ്ടാണ് തീയണച്ചത്. ചേര്‍ത്തല അഗ്‌നിരക്ഷാസേന സ്​റ്റേഷന്‍ ഓഫിസര്‍ ഡി. ബൈജു, അസി. ഫയര്‍ ഓഫിസര്‍ പത്മകുമാര്‍, സീനിയര്‍ ഫയര്‍ റെസ്‌ക്യൂ ഓഫിസര്‍ ജോസഫ് ആന്റണി എന്നിവരുടെ നേതൃത്വത്തിലായിരുന്നു രക്ഷാപ്രവര്‍ത്തനം. തീപിടിത്തമുണ്ടായപ്പോള്‍ തന്നെ ശ്രദ്ധയില്‍പെട്ടതിനാലാണ് കൂടുതല്‍ ഭാഗത്തേക്ക്​ പടരുംമുമ്പ് അണക്കാനായത്. തീപിടിത്തത്തിന്‍റെ കാരണം അറിയാനുള്ള പരിശോധന നടക്കുന്നുണ്ട്. APL fire lodge cherthala ചേർത്തല ഗേള്‍സ് സ്‌കൂള്‍ കവലക്കു സമീപത്തെ ലോഡ്ജിലെ തീ അഗ്​നിരക്ഷാസേന കെടുത്തുന്നു