ഓണക്കിറ്റിൽ കുടുംബശ്രീയുടെ അഞ്ചുലക്ഷം ശർക്കരവരട്ടി റെഡി; ഇനി റേഷൻകടയി​ലേക്ക്​

-ഏത്തക്കയുടെ പൊള്ളുംവിലയിൽ 'ഉപ്പേരി' ഒഴിവാക്കി ആലപ്പുഴ: സർക്കാറിന്‍റെ സൗജന്യ ഓണക്കിറ്റിൽ ഇക്കുറിയും കുടുംബശ്രീയുടെ ശർക്കരവരട്ടി ഇടംപിടിച്ചു. കഴിഞ്ഞവർഷം കുടുംബശ്രീ പങ്കാളിത്തത്തോടെയുള്ള ഓണക്കിറ്റിൽ ശർക്കരവരട്ടിയും ഉപ്പേരിയും നൽകിയിരുന്നു. ഏത്തക്കയുടെ പൊള്ളുന്ന വിലക്കൊപ്പം വെളിച്ചെണ്ണയിൽ വറുത്തെടുക്കുമ്പോൾ ചെലവ്​ വർധിക്കുന്നതിനാൽ 'ഉപ്പേരി' ഒഴിവാക്കി. അഞ്ചുലക്ഷം ശർക്കരവരട്ടിയുടെ ഓർഡറാണ്​ ഇക്കുറി ലഭിച്ചത്​. ആലപ്പുഴ ജില്ലയിൽ ആദ്യഘട്ട കിറ്റ്​ വിതരണത്തിനുള്ള ശർക്കരവരട്ടി വിതരണവും പൂർത്തിയായി. ആലപ്പുഴ, ചേർത്തല, ഹരിപ്പാട്​,​ ചെങ്ങന്നൂർ, മാവേലിക്കര ഡിപ്പോകൾക്ക്​ കീഴിലുള്ള കുടുംബശ്രീ യൂനിറ്റുകളിലാണ്​ ശർക്കരവരട്ടി തയാറാക്കുന്നത്​. ആലപ്പുഴ ടൗണിലെ ജ്വാക്​ വേൾഡിൽ രണ്ടാഴ്​ചയിലേറെ സമയ​മെടുത്ത്​ 46 കുടുംബശ്രീ വനിതകൾ 60,000 ശർക്കരവരട്ടി​ തയാറാക്കി​. 100ഗ്രാം വീതമാണ്​ ശർക്കരവരട്ടി നൽകുക​. കുടുംബശ്രീ ജില്ല മിഷന്​ കീഴിൽ പ്രവർത്തിക്കുന്ന 41 കുടുംബശ്രീ യൂനിറ്റുകളിൽനിന്ന്​ തയാറാക്കിയ ശർക്കരവരട്ടി ഏറ്റെടുത്താണ്​ സപ്ലൈകോക്ക്​ നൽകുന്നത്​. ഏത്തക്കയുടെ വില കൂടിയതിനാൽ മുൻവർഷത്തെ അപേക്ഷിച്ച്​ ചെലവ്​ കൂടുതലായിരുന്നു. കഴിഞ്ഞതവണ രണ്ടരലക്ഷം ഉപ്പേരി, ശർക്കരവരട്ടി പാക്കറ്റിനായിരുന്നു ഓർഡർ. ഇത്‌ കൃത്യമായി വിതരണം ചെയ്‌തതിനാലാണ്​ ഇത്തവണ ഓർഡർ ഇരട്ടിയായത്​. അതീവ സുരക്ഷയോടെ തയാറാക്കുന്ന ശർക്കരവരട്ടി സപ്ലൈകോ ഡിപ്പോകളിലേക്കാണ്‌ നൽകുക. അവിടെനിന്ന്‌ കിറ്റുകളിൽ നിറച്ച്​ റേഷൻ കടകളിലേക്ക്‌ എത്തും. കോവിഡ് കാലത്ത്‌ കുടുംബശ്രീക്ക്‌ നല്ല വിറ്റുവരവാണ് ലക്ഷ്യം. കഴിഞ്ഞ വർഷം ഉപ്പേരി, ശർക്കരവരട്ടി നൽകിയ ഇനത്തിൽ കുടുംബശ്രീ യൂനിറ്റുകൾക്ക്‌ 84,50,798 രൂപയുടെ വിറ്റുവരവ് ലഭിച്ചു. ഇപ്രാവശ്യം ഒരുകോടിയുടെ വിറ്റുവരവാണ്‌ പ്രതീക്ഷിക്കുന്നത്. ഓണക്കാലത്ത്‌ മുൻവർഷങ്ങളിലെപ്പോലെ യൂനിറ്റുകൾക്ക്‌ ആശ്വാസം നൽകുന്ന ഈ പദ്ധതിക്ക്‌ ജില്ല മിഷൻ കോഓഡിനേറ്റർ ജെ. പ്രശാന്ത് ബാബു, എ.ഡി.എം.സി എം.ജി. സുരേഷ്​, ഡി.പി.എം സാഹിൽ എന്നിവരാണ്​ നേതൃത്വം നൽകുന്നത്​. APL kudumbashree sharkaravaratty, APL kudumbashree unit കുടുംബശ്രീ യൂനിറ്റിലെ വനിതകൾ ഓണക്കിറ്റിലേക്ക്​ തയാറാക്കുന്ന ശർക്കരവരട്ടി