സ്വാതന്ത്ര്യ ദിനാഘോഷ റാലി നടത്തി

ചെങ്ങന്നൂർ: 75ാമത് സ്വാതന്ത്ര്യ ദിനാഘോഷത്തിൽ ചെങ്ങന്നൂർ ചിന്മയ വിദ്യാലയ യുവകേന്ദ്ര നടത്തിയ സ്വാതന്ത്ര്യ ദിനാഘോഷ റാലി നഗരസഭ ചെയർപേഴ്സൻ മറിയാമ്മ ജോൺ ഫിലിപ് ഉദ്ഘാടനം ചെയ്തു. അങ്ങാടിക്കൽ എസ്.സി.ആർ.വി സ്കൂൾ അധ്യാപകൻ എം.കെ. മനോജ് ഭരണഘടനയുടെ ആമുഖം ചൊല്ലിക്കൊടുത്തു. ചെങ്ങന്നൂർ നഗരസഭയുടെ സമീപത്തെ ഗാന്ധി പ്രതിമയുടെ മുന്നിൽ 75 ദീപം തെളിച്ച് സ്വാതന്ത്ര്യ ദിനാഘോഷ റാലി ആരംഭിച്ചു. ഗാന്ധിജി, ജവഹർലാൽ നെഹ്റു, ഭഗത് സിങ്​, ലാൽ ബഹദൂർ ശാസ്ത്രി എന്നിവരുടെ വേഷം അണിഞ്ഞ കുട്ടികൾ ഘോഷയാത്രയിൽ അണിനിരന്നു. വിവിധ സംസ്ഥാനങ്ങളെ പ്രതിനിധാനം ചെയ്യുന്നവരുടെ വേഷവിധാനങ്ങളണിഞ്ഞ് ദേശഭക്തിഗാനമാലപിച്ച് ത്രിവർണ പതാകയേന്തിയ വിദ്യാർഥികൾ ഘോഷയാത്രക്ക്​ മാറ്റുകൂട്ടി. നഗരസഭ കൗൺസിലർമാരായ അശോക് പടിപ്പുരക്കൽ, മനു കൃഷ്ണൻ, സ്കൂൾ വൈസ് പ്രസിഡന്‍റ്​ എം.പി. പ്രതിപാൽ പുളിമൂട്ടിൽ, മാനേജർ സി. അശോക് പ്രിൻസിപ്പൽ ആർ. പ്രീതി എന്നിവർ സംസാരിച്ചു.