എക്സൽ ഗ്ലാസിലെ മണലൂറ്റ്: ജില്ല ഭരണകൂടം അന്വേഷണം നടത്തണമെന്ന് റവന്യൂ മന്ത്രി

മാരാരിക്കുളം: എക്സൽ ഗ്ലാസിലെ മണലൂറ്റ് വിഷയത്തിൽ ജില്ല ഭരണകൂടം അന്വേഷണം നടത്തണമെന്ന് റവന്യൂ മന്ത്രിയുടെ നിർദേശം. ഇവിടെനിന്ന്​ അനധികൃതമായി മണൽ കടത്തുന്നതായി കാട്ടി മാരാരിക്കുളം തെക്ക് പഞ്ചായത്ത് അംഗം ടി.പി. ഷാജി മന്ത്രിക്ക്​ നൽകിയ പരാതിയിലാണ് മന്ത്രി കെ. രാജൻ വിശദമായ പരിശോധന നടത്തി നടപടി സ്വീകരിക്കാൻ ആവശ്യപ്പെട്ടത്. ലിക്വിഡേഷൻ നടപടിയായ എക്സൽ ഗ്ലാസിൽ സ്ഥാവര ജംഗമവസ്തുക്കൾ ലേലത്തിലൂടെ വിൽപന നടന്നുവരികയാണ്. ഇതിന്റെ ഭാഗമായി വിൽപന നടന്ന കെട്ടിടസമുച്ചയങ്ങൾ പൊളിച്ചുനീക്കുന്നതിന്റെ മറവിലാണ് വൻതോതിൽ മണലൂറ്റൽ നടക്കുന്നത്.