വെള്ളമിറങ്ങാതെ ഗ്രാമീണ റോഡുകൾ; യാത്രദുരിതം ഇരട്ടിയായി

-മഴ മുന്നറിയിപ്പ്​ നിലനിൽക്കുന്നതിനാൽ ഭീതിയൊഴിയുന്നില്ല ആലപ്പുഴ: മഴമാറി അന്തരീക്ഷം തെളിഞ്ഞിട്ടും കുട്ടനാട്ടിലെ ആറുകളിലും തോടുകളിലും ജലനിരപ്പ്​ താഴുന്നില്ല. കിഴക്കൻവെള്ളത്തിന്‍റെ വരവിൽ കുട്ടനാട്​, അപ്പർകുട്ടനാട്​ മേഖലകളിലെ പാടശേഖരങ്ങളിലെ മടവീഴ്ചയിൽ നിരവധി ഗ്രാമീണ റോഡുകൾ വെള്ളത്തിലായി. തകഴിയിലും ചമ്പക്കുളത്തും​​ നെടുമുടിയിലും കൈനകരിയിലും മടവീഴ്ചയുണ്ടായതാണ്​ ഏറ്റവും ഒടുവിലത്തേത്​. എടത്വ-ചമ്പക്കുളം, മുട്ടാർ-ചക്കുളത്തുകാവ്​, എടത്വ -ഹരിപ്പാട്​, നീരേറ്റുപുറം -കിടങ്ങറ, വെളിയനാട് ​-കിടങ്ങറ, കാവാലം -കൃഷ്​ണപുരം -നാരകത്തറ റോഡുകളിൽ വെള്ളംകയറിയത്​. ഇതിനൊപ്പം ആലപ്പുഴ -ചങ്ങനാശ്ശേരി റോഡിന്​ സമാന്തരമായി പോകുന്ന മാമ്പുഴക്കരി, രാമങ്കരി, വേഴപ്ര, കൈനകരി റോഡുകളിലും വെള്ളംനിറഞ്ഞു. കിഴക്കൻവെള്ളത്തിന്‍റെ വരവിൽ പമ്പാനദിയിൽ ജലമുയർന്ന്​ കരകവിഞ്ഞാണ്​ പലയിടത്തും ജലമെത്തിയത്​. രക്ഷാദൗത്യത്തിനായി ജില്ലയിലെത്തിയ 21അംഗ എൻ.ഡി.ആർ.എഫ്​ സംഘം ചെങ്ങന്നൂർ മേഖല കേന്ദ്രീകരിച്ചാണ് പ്രവർത്തനം. ശനിയാഴ്ച ജില്ലയിൽ മഴ കാര്യമായി പെയ്തിരുന്നില്ല. എന്നാൽ, കിഴക്കൻവെള്ളത്തിന്‍റെ വരവിന്​ കുറവുണ്ടായില്ല. തോട്ടപ്പള്ളിയിലെ 29 ഷട്ടറുകളും തണ്ണീർമുക്കത്തെ മുഴുവൻ ഷട്ടറുകളും തുറന്നുവിട്ട്​ ജലമൊഴുക്കിയിട്ടും വെള്ളം കുറയുന്നില്ല. അപ്പർകുട്ടനാട്​​ മേഖലയിലെ താഴ്ന്നപ്രദേശങ്ങളിലാണ്​ ദുരിതം കൂടുതൽ. പാടശേഖരങ്ങളിലും ജലാശയങ്ങളിലും ജലനിരപ്പ്​ ഉയർന്നുതന്നെയാണ്​. കുട്ടനാട്ടിൽനിന്ന്​ എത്തുന്ന അധികജലം വേലിയേറ്റത്തിൽ കടൽ എടുക്കാത്തതാണ്​ പ്രശ്നം. അച്ചൻകോവിൽ, മണിമല നദികളിൽ ജലനിരപ്പ്​ സമാനരീതിയിൽ തുടരുകയാണ്​. എന്നാൽ, പമ്പാനദിയിൽ ക്രമാതീതമായി ജലമുയർന്നാണ്​ നിരവധി വീടുകളിൽ വെള്ളം കയറിയത്​. ഇതോടെ, പലരും ദുരിതാശ്വാസ ക്യാമ്പുകളിലും ബന്ധുവീടുകളിലും അഭയംതേടി. മഴ മുന്നറിയിപ്പ്​ നിലനിൽക്കുന്നതിനാൽ സാധാരണനിലയിലേക്ക്​ ജീവിതമെത്താൻ ഇനിയും ദിവസങ്ങൾ വേണ്ടിവരും.