വഴിയോരത്തെ ആറ്​ തട്ടുകൾ ഒഴിപ്പിച്ചു

-പ്രതിഷേധവുമായി കച്ചവടക്കാർ ആലപ്പുഴ: വഴിയോരത്തെ ആറ്​ തട്ടുകൾ ഒഴിപ്പിച്ച നഗരസഭ അധികൃതരുടെ നടപടിയിൽ വഴിയോരകച്ചവടക്കാരുടെ വാക്കേറ്റവും പ്രതിഷേധവും. തിങ്കളാഴ്ച ഉച്ചയോടെ ജില്ലകോടതി പാലത്തിന്​ സമീപം വഴിയോരകച്ചവടക്കാരെ ഒഴിപ്പിക്കാനെത്തിയപ്പോഴാണ്​ സംഭവം. വഴിവാണിഭത്തിന്​ നഗരസഭ കാർഡ്​ അനുവദിച്ചവർക്ക്​ മാത്രമേ കച്ചവടം നടത്താനാകൂവെന്ന നിലപാട്​ എടുത്തതാണ്​ വാക്കേറ്റത്തിന്​ കാരണമായത്​. നഗരസഭ കാർഡ്​ നൽകാൻ തയാറാക്കിയ പുതിയ ലിസ്​റ്റിൽ ഇടംപിടിച്ച വഴിയോരകച്ചവടക്കാർ അനുമതി നൽകണമെന്നായിരുന്നു ഒരുവിഭാഗത്തിന്‍റെ വാദം. പിന്നീട്​ സൗത്ത്​ പൊലീസിന്‍റെ സഹായത്തോടെ ആറ്​ തട്ടുകൾ പൂർണമായും ഒഴിപ്പിച്ചു. ഒരുദിവസത്തെ സാവകാശം നൽകി 10പേരെ താക്കീത്​ ചെയ്​തു. ആലപ്പുഴ കോടതിപാലം മുതല്‍ ഇന്ദിര ജങ്​ഷന്‍ വരെയുള്ള റോഡിന്‍റെ ഇരുവശത്തുമുള്ള അനധികൃതമായി വ്യാപാരം നടത്തിയ നാലുചക്ര ഉന്തുവണ്ടികളും കാല്‍നടയാത്രക്കാര്‍ക്ക് ബുദ്ധിമുട്ടുണ്ടാക്കി ഫുട്പാത്തിലേക്ക് ഇറക്കി വ്യാപാരം നടത്തിയ തട്ടുകള്‍, ബോർഡുകൾ എന്നിവയാണ്​ നോര്‍ത്ത് പൊലീസ് സഹായത്തോടെ പിടിച്ചെടുത്തത്​. സ്വയം ഒഴിഞ്ഞുപോകാന്‍ തയാറായ കച്ചവടക്കാരെ സാധനങ്ങള്‍ പിടിച്ചെടുക്കാതെ അനുവദിച്ചു. വരുംദിവസങ്ങളിലും പരിശോധന തുടരുമെന്ന്​ നഗരസഭ അധ്യക്ഷ സൗമ്യ രാജ്, ആരോഗ്യ സ്ഥിരം സമിതി അധ്യക്ഷ ബീന രമേശ് എന്നിവർ അറിയിച്ചു. ആലപ്പുഴ നഗരസഭ സര്‍ക്കിള്‍ ഹെല്‍ത്ത് സ്ക്വാഡ് ലീഡര്‍ ആര്‍. അനില്‍കുമാര്‍, ടി.എം. ഷംസുദ്ദീന്‍, ജെ. അനിക്കുട്ടന്‍, ഹർഷിദ്​, സി. ജയകുമാര്‍, വി. ശിവകുമാര്‍, ആര്‍. റിനോഷ്, ഷബീന അഷ്റഫ്, ബി. ഷാലിമ എന്നിവർ നേതൃത്വം നൽകി. APL municipality squard ആലപ്പുഴ നഗരസഭയുടെ നേതൃത്വത്തിൽ ജില്ലകോടതി പാലത്തിന്​ സമീപം വഴിയോരകച്ചവടക്കാരെ ഒഴിപ്പിക്കുന്നു