സൈനിക ​പെൻഷൻ ഭർതൃസഹോദരി തട്ടിയെടുത്തതായി പരാതി

യുവതി പൊലീസിൽ പരാതി നൽകി മാന്നാർ: വിമുക്തഭടനായ ആദ്യ ഭർത്താവിന്‍റെ പെൻഷൻ തുക ഭർതൃസഹോദരി കള്ളരേഖകൾ ചമച്ച് തട്ടിയെടുത്തതായി യുവതിയുടെ പരാതി. മാന്നാർ കുട്ടമ്പേരൂർ തോപ്പിൽ വീട്ടിൽ വിജേഷ്‌കുമാറിന്‍റെ ഭാര്യ അംബികയാണ് തന്‍റെ ആദ്യ ഭർത്താവിന്‍റെ പെൻഷൻതുക തട്ടിയെടുത്തതായി ചൂണ്ടിക്കാട്ടി മാവേലിക്കര പൊലീസിൽ പരാതി നൽകിയത്​. 16​ വർഷമായി തുക തട്ടിയെടുക്കുകയാണെന്നാണ്​ പരാതി. കരസേനയിൽനിന്ന്​ വിരമിച്ച ശേഷം 2004 മാർച്ച് 23നാണ് മാവേലിക്കര തെക്കേക്കര ഉമ്പർനാട് സ്വദേശിയായ രാജേന്ദ്രൻ മരിച്ചത്. തുടർന്ന് പെൻഷൻതുക സഹോദരി മണിയമ്മ തട്ടിയെടുത്തെന്നും ഇതിന്​ ബാങ്ക് ഉദ്യോഗസ്ഥർ കൂട്ടുനിന്നെന്നുമാണ്​ പരാതി. രാജേന്ദ്രന്‍റെ മരണത്തെത്തുടർന്ന് അംബിക 2006 ഒക്ടോബറിലാണ്​ വിജേഷ്‌കുമാറിനെ വിവാഹം ചെയ്തത്​.