നാട്ടുകാർക്ക്​ കൗതുകമായ മയിൽ ഒടുവിൽ കണ്ണീരായി

ചാരുംമൂട്: നാട്ടുകാർക്ക് കൗതുകമായി പ്രദേശത്തെത്തിയ മയിൽ ഷോക്കേറ്റ് ചത്തു. താമരക്കുളം ഗ്രാമപഞ്ചായത്തിലെ വേടരപ്ലാവ് കടമ്പാട്ട് ക്ഷേത്രത്തിനുസമീപം വെച്ച് ചൊവ്വാഴ്ച രാവിലെയായിരുന്നു സംഭവം. ദിവസങ്ങളായി താമരക്കുളം, വേടരപ്ലാവ് പ്രദേശങ്ങളിലായി മയിലിനെ നാട്ടുകാർ കണ്ടിരുന്നു. ബുധനാഴ്ച രാവിലെ കടമ്പാട്ട് ക്ഷേത്രത്തിന്​ മുൻവശത്തുള്ള റോഡിലൂടെ വന്ന മയിൽ തെരുവുനായ്ക്കളെ കണ്ട് പറക്കുമ്പോഴാണ് സമീപത്തെ ട്രാൻസ്ഫോർമറിന് മുകളിലത്തെ വൈദ്യുതി കമ്പികളിൽ തട്ടി ഷോക്കേറ്റ്. അയൽവാസികൾ ഓടിയെത്തിയെങ്കിലും ചത്തിരുന്നു. കാലുകളും പീലിയും ഷോക്കേറ്റ് കരിഞ്ഞു. വിവരം അറിഞ്ഞ് പഞ്ചായത്ത് പ്രസിഡന്‍റ്​ ജി. വേണു, അംഗങ്ങളായ വി. പ്രകാശ്, സെകട്ടറി ഹരി എന്നിവരെത്തി ഫോറസ്റ്റ് ഉദ്യോസ്ഥരുമായി ബന്ധപ്പെട്ടു. റാന്നി ഡിവിഷനിലെ കരിക്കുളം സ്റ്റേഷനിൽനിന്ന്​ സെക്​ഷൻ ഓഫിസർ പി.എസ്. സുധീഷും സംഘവും എത്തി പോസ്റ്റ്​മോർട്ടത്തിനുള്ള നടപടി സ്വീകരിക്കുകയും ചെയ്തു. താമരക്കുളം മൃഗാശുപത്രിയിലെ സീനിയർ വെറ്ററിനറി സർജൻ ഡോക്ടർ ജെ. സുൽഫിക്കറി‍ൻെറ നേതൃത്വത്തിലായിരുന്നു പോസ്റ്റ്​മോർട്ടം. തുടർന്ന് സമീപം പറമ്പിൽ മയിലിന്റെ ജഡം മറവുചെയ്തു. Photo. താമരക്കുളം വേടരപ്ലാവിൽ ഷോക്കേറ്റ് ചത്ത മയിലിനെ പോസ്റ്റ്​മോർട്ടത്തിനായി എത്തിച്ചപ്പോൾ