അധ്യാപകൻ ഉണ്ണികൃഷ്ണന് ആദരം

അമ്പലപ്പുഴ: മൂന്ന്​ പതിറ്റാണ്ടായി നൂറുകണക്കിന് വിദ്യാർഥികൾക്ക് എസ്.എസ്.എൽ.സി പരീക്ഷയിൽ ഉന്നത വിജയം കരസ്ഥമാക്കാൻ യത്നിച്ച യു.കെ.ഡി അധ്യാപകൻ ഉണ്ണികൃഷ്ണന് പുന്നപ്ര പൗരാവലി സ്വീകരണം നൽകി. നൂറുകണക്കിന് മത്സ്യ, കാർഷിക മേഖലയിലെ തൊഴിലാളി കുടുംബങ്ങളിലെയും പാവപ്പെട്ട വിദ്യാർഥികളെയും ഉന്നത വിജയം കരസ്ഥമാക്കാനും അവരെ സാമൂഹിക പ്രതിബദ്ധതയുള്ള പൗരന്മാരായി വാർത്തെടുക്കാനും ജീവിതം ഉഴിഞ്ഞുവെച്ച ഉണ്ണി സാറിന്‍റെ സ്ഥാനം ജനഹൃദയങ്ങളിൽ ആഴത്തിൽ പതിഞ്ഞിരിക്കുകയാണെന്ന് പുന്നപ്ര മാർക്കറ്റ് ജങ്​ഷനിൽ പൗരസ്വീകരണം ഉദ്ഘാടനം ചെയ്യവേ മുൻ മന്ത്രി ജി. സുധാകരൻ പറഞ്ഞു. പുന്നപ്ര സൗത്ത് ഗ്രാമപഞ്ചായത്ത് പ്രസിഡന്‍റ്​ പി.ജി. സൈറസ് അധ്യക്ഷത വഹിച്ചു. ജില്ല ലൈബ്രറി കൗൺസിൽ പ്രസിഡന്‍റ്​ അലിയാർ മാക്കിയിൽ ആമുഖപ്രഭാഷണം നടത്തി. ജനപ്രതിനിധികളായ ഷീജ, എൻ.കെ. ബിജു, വിവിധ സംഘടനകളെ പ്രതിനിധാനം ചെയ്ത്​ ഇ.കെ. ജയൻ, ജി. മനോജ്കുമാർ, പുന്നപ്ര മധു, ഹസൻ എം. പൈങ്ങാമഠം, യു.എം. കബീർ, നൂറുദ്ദീൻ ഹാഫിയത്ത്, നിസാർ വെള്ളാപ്പള്ളി, ജോബ് ജോസഫ്, മൈക്കിൾ പി. ജോൺ, സുധീർ പുന്നപ്ര തുടങ്ങിയവർ ആശംസ നേർന്നു. തുടർന്ന്, ഗ്രാമപഞ്ചായത്ത് പ്രസിഡന്‍റ്​ പി.ജി. സൈറസിന്‍റെയും ജനപ്രതിനിധികളുടെയും നൂറുകണക്കിന് ശിഷ്യഗണങ്ങളുടെയും വാദ്യഘോഷങ്ങളുടെ അകമ്പടിയോടെയും യു.കെ.ഡി അങ്കണത്തിലേക്ക് സ്വീകരിച്ചു. പൗരസമിതി ഭാരവാഹികളായ തയ്യിൽ ഹബീബ്, നസീർ സലാം തുടങ്ങിയവർ സ്വീകരണങ്ങൾക്ക് നേതൃത്വം നൽകി.