കുടിവെള്ള പദ്ധതി രണ്ടാംഘട്ടം നിർത്തിയിട്ട്​ ഒരുമാസം; മഴ പോയിട്ടും അനക്കമില്ല

ആലപ്പുഴ: ആലപ്പുഴ ശുദ്ധജല പദ്ധതി രണ്ടാംഘട്ടം പൈപ്പിടൽ മുടങ്ങിയിട്ട്​ ഒരുമാസം പിന്നിടുന്നു​. മഴയുടെ പേരിൽ മുടങ്ങിയ പണി മഴ കുറഞ്ഞ സാഹചര്യത്തിലും പുനരാരംഭിച്ചിട്ടില്ല. പദ്ധതിയുടെ ചുമതലയുള്ള ഉദ്യോഗസ്ഥർ വിളിച്ചാൽ കരാറുകാരൻ ഫോൺ പോലും എടുക്കുന്നില്ലെന്നാണ്​ അധികൃതർ പറയുന്നത്​. ഒന്നാംഘട്ടം പൂർത്തിയാക്കിയ കരാറുകാരൻ രണ്ടാംഘട്ടം പകുതിയിൽ നിർത്തുകയായിരുന്നു. പൈപ്പിടലും റോഡ് പൂർവ സ്ഥിതിയിലാക്കലും സ്വന്തം ചെലവിൽ നടത്തേണ്ടിവരുന്നതാണ് പിന്മാറ്റത്തിനു കാരണമെത്രെ. കരാറുകാരന് കൂടുതൽ പണം അനുവദിക്കാൻ അതോറിറ്റിയിലെ ചില ഉന്നത ഉദ്യോഗസ്ഥർ ശ്രമിക്കുന്നതായി മുമ്പ്​ ആക്ഷേപം ഉയർന്നിരുന്നു. ഇത്തരത്തിൽ പണം നൽകാൻ നേരത്തേ ഉന്നതർ അനുമതി നൽകിയെങ്കിലും ബന്ധപ്പെട്ട ഉദ്യോഗസ്ഥർ ചട്ടങ്ങളും കരാർ വ്യവസ്ഥയും മറ്റും ചൂണ്ടിക്കാട്ടി തടയിടുകയായിരുന്നു. പദ്ധതി തുടങ്ങിയപ്പോൾ നിലവാരമില്ലാത്ത പൈപ്പുകൾ ഉപയോഗിച്ചതിലൂടെ സർക്കാറിന് വലിയ നഷ്ടം വരുത്തിയെന്ന്​ കണ്ടെത്തി കരാറുകാരന്റെ ഉത്തരവാദിത്തത്തിലാണ് ഇപ്പോൾ മൈൽഡ് സ്റ്റീൽ പൈപ്പുകൾ ഇടുന്നത്. ചേർത്തലയിലെ നബാർഡ് പദ്ധതി പ്രവൃത്തിയുടെ പേരിൽ ഈ കരാറുകാരന്​ നൽകേണ്ട നാല്​ കോടിയോളം രൂപ അതോറിറ്റി ഇക്കാരണങ്ങളാൽ നൽകിയിട്ടില്ല. മറ്റു ചില പണികളുടെ പേരിലും പണം നൽകാനുണ്ട്. ഒരു പദ്ധതി പൂർത്തിയായാൽ മൂന്ന്​ വർഷം വരെ അതു ശരിയായി പ്രവർത്തിക്കുന്നുവെന്ന് ഉറപ്പാക്കിയ ശേഷമേ പണം നൽകാവൂ എന്നാണ് ചട്ടമെന്ന് ഉദ്യോഗസ്ഥർ ചൂണ്ടിക്കാട്ടുന്നു. നേരത്തേ എട്ട്​ ലക്ഷത്തിലേറെ രൂപയുടെ ബിൽ ഉന്നത ഉദ്യോഗസ്ഥർ പാസാക്കിയപ്പോഴാണ് ഈ പ്രശ്നങ്ങൾ ചൂണ്ടിക്കാട്ടി ഉദ്യോഗസ്ഥർ തടസ്സം ഉന്നയിച്ചത്. പൈപ്പ് മാറ്റിയിടുന്നതിന്​ പിന്നാലെ റോഡ് പൂർവ സ്ഥിതിയിലാക്കുന്നതിന്റെ ഉത്തരവാദിത്തവും കരാറുകാരനാണ്. പൈപ്പിട്ടതിന്​ മുകളിൽ ഗ്രാനുലർ സബ് ബേസ് (ജി.എസ്​.ബി) ഇട്ട്​ നിരപ്പാക്കണമെന്നാണ് വ്യവസ്ഥ. പൈപ്പിട്ട ഭാഗത്ത് കരാറുകാരൻ ഇതുവരെ ഇത്​ ചെയ്തിട്ടില്ല. മണ്ണിട്ട്​ മൂടുക മാത്രമാണ് ചെയ്തത്. ഇത് അപകടങ്ങൾക്ക്​ ഇടയാക്കുകയും​ റോഡിന്​ കേടുണ്ടാകുകയും ചെയ്തതോടെ ജനങ്ങൾ പ്രതിഷേധിച്ചു. ഇപ്പോൾ ജി.എസ്.ബി ജോലി മറ്റു കരാറുകാരെക്കൊണ്ട് അതോറിറ്റി ചെയ്യിക്കുകയാണ്. ശുദ്ധജല പദ്ധതിയിലെ നിലവാരമില്ലാത്ത പൈപ്പുകൾ മാറ്റി പുതിയവ ഇടുന്ന പണി നിലച്ചതിനെപ്പറ്റി അന്വേഷിക്കുമെന്നും കരാറുകാരൻ വീഴ്ച വരുത്തിയിട്ടുണ്ടെങ്കിൽ നടപടിയെടുക്കുമെന്നും ജല അതോറിറ്റി അധികൃതർ പറഞ്ഞു.