കായൽക്കാഴ്ച കാണാൻ വാട്ടർ ടാക്സി; കുറഞ്ഞ ചെലവിൽ ജലയാത്ര

ഒരുമണിക്കൂർ ചുറ്റാൻ ഒരാൾക്ക്​ 150 രൂപ; 15 മിനിറ്റിന്​ 40 രൂപ ആലപ്പുഴ: ജലഗതാഗത വകുപ്പ്​ വിനോദസഞ്ചാരികൾക്ക്​ കായൽസൗന്ദര്യം ആസ്വദിക്കാൻ തയാറാക്കിയ വാട്ടർ ടാക്സി മുഹമ്മ ബോട്ട്​ജെട്ടിയിൽനിന്ന്​ സർവിസ്​ ആരംഭിച്ചു. ഒരുമണിക്കൂർ യാത്രക്ക്​ ഒരാൾക്ക്​ 150 രൂപ വീതം 10 പേർക്ക് 1500 രൂപയും 15 മിനിറ്റ്​ യാത്രക്ക്​ ഒരാൾക്ക്​ 40 രൂപവീതം 400 രൂപയുമാണ്​ ചാർജ്​. കുറഞ്ഞ ചെലവിൽ പാതിരാമണൽ, പുത്തൻകായൽ, തണ്ണീർമുക്കം ബണ്ട്, കുമരകം പക്ഷിസങ്കേതം, കുട്ടനാട്​ എന്നിവയടക്കമുള്ള പ്രദേശത്തെ കാഴ്ചകൾ കാണാനാകുമെന്നതാണ്​ പ്രത്യേകത. കായിപ്പുറം, കണ്ണങ്കര, കുമരകം എന്നിവിടങ്ങളിലെത്തുന്ന വിനോദസഞ്ചാരികൾക്ക് ഇത്​ പ്രയോജനകരമാണ്​. മുഹമ്മ ബോട്ട്​ജെട്ടിയിൽനിന്ന്​ സർവിസ്​ തുടങ്ങിയ ആദ്യദിനംതന്നെ ബുക്കിങ്ങിന്​ വൻതിരക്കായിരുന്നുവെന്ന്​ സ്​റ്റേഷൻ മാസ്റ്റർ ഷാനവാസ്​ ഖാൻ 'മാധ്യമ'ത്തോട്​ പറഞ്ഞു. ഹൈസ്പീഡ്​ ഔട്ട്​ബോർഡ്​ ഡീഡൽ എൻജിനുള്ള വാട്ടർ ടാക്സി യാത്രക്കാർക്ക്​ പുതിയ യാത്രാനുഭവം പകരും. 14 നോട്ടിക്കൽമൈൽ സ്പീഡിൽ 30 കിലോമീറ്റർവരെ സഞ്ചരിക്കാം. മുഹമ്മ സ്‌റ്റേഷനിൽ വിനോദസഞ്ചാരികളുടെ തിരക്ക് കൂടിയ സാഹചര്യത്തിലാണ്​ പുതിയസർവിസ്​ തുടങ്ങിയത്​. ഇത്​ ലാഭകരമാണെങ്കിൽ മേഖലയിൽ കൂടുതൽ ടാക്സി ബോട്ടുകൾ അനുവദിക്കാനും സർക്കാറിന് പദ്ധതിയുണ്ട്. ജലഗതാഗത വകുപ്പിന്റെ ടാക്സി മേഖലയിൽ പുത്തൻ ഉണർവേകുമെന്നാണ്​ പ്രതീക്ഷ. രാവിലെ ഒമ്പത്​ മുതൽ വൈകീട്ട്​ ആറുവരെ അന്വേഷണങ്ങൾക്കും ബുക്കിങ്ങിനും 9400050331നമ്പറിൽ വിളിക്കാം. വാട്ടർ ടാക്സി സർവിസിന്‍റെ ഉദ്​ഘാടനം മുഹമ്മ പഞ്ചായത്ത് പ്രസിഡന്‍റ്​ സ്വപ്ന ഷാബു നിർവഹിച്ചു. പഞ്ചായത്ത് വൈസ് പ്രസിഡന്റ് എം.ടി. റെജി, വാർഡ്​ അംഗം എസ്​.ടി. റെജി, സ്​റ്റേഷൻ മാസ്​റ്റർ ഷാനവാസ്‌ ഖാൻ എന്നിവർ സംസാരിച്ചു. 10 പേരടങ്ങുന്ന ആദ്യസംഘം കുമരകം, കുട്ടനാട്​ മേഖലകൾ സഞ്ചരിച്ചു. ​ APL water taxi ജലഗതാഗത വകുപ്പിന്‍റെ വാട്ടർ ടാക്സി APL water taxi inaguration മുഹമ്മ ബോട്ടുജെട്ടിയിൽ വാട്ടർടാക്സിയുടെ ഉദ്​ഘാടനം പഞ്ചായത്ത് പ്രസിഡന്‍റ്​ സ്വപ്ന ഷാബു നിർവഹിക്കുന്നു