ഹേനയുടെ കൊലപാതകം: സാമ്പത്തിക ഇടപാടുകളില്‍ അന്വേഷണം തുടങ്ങി

ചേര്‍ത്തല: മാനസികവെല്ലുവിളി നേരിടുന്ന നവവധുവിനെ കൊലപ്പെടുത്തിയ സംഭവത്തിൽ ​സാമ്പത്തിക ഇടപാടുകളിൽ പൊലീസ്​ അന്വേഷണം ആരംഭിച്ചു. കഴിഞ്ഞമാസം 26നാണ്​ കൊട്ടാരക്കര വെളിനല്ലൂര്‍ സ്വദേശിനി ഹേനയെ​ (42) ഭർത്താവ്​ അപ്പുക്കുട്ടൻ കൊലപ്പെടുത്തിയത്​. സ്ത്രീധന പീഡനമാണ് കൊലപാതകത്തിന്​ പിന്നില്ലെന്ന ബന്ധുക്കളുടെ പരാതിയിലാണ്​ പൊലീസ് പ്രത്യേക അന്വേഷണം നടത്തുന്നത്​. ഇതിനായി ഹേനയുടെ ബന്ധുക്കളുടെ മൊഴിയെടുത്തു. സാമ്പത്തിക ഇടപാടുകള്‍ അന്വേഷിക്കുന്നതിന്റെ ഭാഗമായി പ്രതിയായ അപ്പുക്കുട്ടനെ (50) പൊലീസ്​ കസ്റ്റഡിയിൽ വാങ്ങാൻ ചൊവ്വാഴ്ച കോടതിയില്‍ അപേക്ഷ നൽകുമെന്നാണ്​ വിവരം. നിലവില്‍ കൊലപാതകം, ഗാര്‍ഹികപീഡനം എന്നീ വകുപ്പുകൾ ചുമത്തിയാണ്​ കേസെത്തിട്ടുള്ളത്​. കേസിന്റെ അന്വേഷണച്ചുമതല ചേര്‍ത്തല ഡിവൈ.എസ്.പി ടി.ബി. വിജയനാണ്​. വിശദമായ അന്വേഷണത്തിനുശേഷം മാത്രമേ സ്ത്രീധന നിരോധന നിയമപ്രകാരം കേസെടുക്കണമോയെന്ന കാര്യം തീരുമാനിക്കുകയുള്ളൂവെന്ന്​ ​പൊലീസ്​ പറഞ്ഞു. മേയ്​ 26ന്​ രാവിലെ 11.30ന്​ ഹേനയെ കുളിമുറിയില്‍ മരിച്ചനിലയില്‍ കണ്ടെത്തുകയായിരുന്നു. കുളിമുറിയില്‍ വീണ് ബോധരഹിതയായെന്ന് പറഞ്ഞാണ് അപ്പുക്കുട്ടന്‍ സുഹൃത്തുക്കളുടെ സഹായത്തോടെ സ്വകാര്യ ആശുപത്രിയില്‍ എത്തിച്ചത്. പിന്നീടാണ്​ കൊലപാതകമെന്ന്​ തെളിഞ്ഞത്.